كوز تيۋدەن ساقتانۋدىڭ 7 جولى

استانا. قازاقپارت - كوز تيۋ ماسەلەسىنە قاتىستى پايعامبارىمىز (س. ا. ۋ. ) : «كوز تيۋ - اقيقات، بار نارسە» ، - دەگەن.

كوز تيۋ، كوبىنەسە، كۇنشىلدىك، كورەالماۋشىلىق، قىزعانىش سەزىمدەرىنىڭ كەسىرىنەن بولادى. ابدۋللاھ يبن ومار (ر. ا. ) : «راسۋلۋللاھ (س. ا. ۋ. ) :

- مۇميندەردىڭ ابزالى - جۇرەگى تازا، ءتىلى شىنشىل بولعان ءمۇمين، - دەدى. ادامدار:

- تازا جۇرەك قانداي بولادى؟ - دەپ سۇراعاندا، ول (س. ا. ۋ. ) :

- تاقۋا، كۇپىرلىكتەن تازا، كۇنا ىستەۋ نيەتى مەن ادىلەتسىزدىكتەن اۋلاق، كەك ساقتاماعان جانە كۇنشىل بولماعان جۇرەك، - دەدى.

- ونداي جۇرەكتىڭ يەسى كىم؟

- دۇنيەنى ۇمىتىپ، اقىرەتتى قالاعاندار.

- ودان كەيىن كىم؟

- مىنەز- قۇلىعى جاقسى بولعان ءمۇمين» ، - دەدى.

كورەالماۋشىلىق قاتتى قىزىعۋ نەمەسە قىزعانۋ سەزىمدەرىنەن تۋىندايدى. ومىردە قىزعانا قاراعاننىڭ ناتيجەسىندە كوز تيۋ سەبەبىنەن وسىمدىك، جانۋار، ءتىپتى ادام دا مەرت بولاتىن جاعدايلار كەزدەسەدى.

كوز تيۋدەن ساقتانۋدىڭ جولدارى:

 1. ءاردايىم دۇعادا ءجۇرىپ، «ءفالاق» ، « ءناس» سۇرەلەرىن ءجيى وقۋ. كوز تيۋدەن قاۋىپتەنگەن جاعدايدا پايعامبارىمىزدىڭ (س. ا. ۋ. ) : «كىمدە- كىم وزىنەن، مال- دۇنيەسىنەن نەمەسە باۋىرىنان وزىنە ۇناعان نارسەنى كورسە، ونىڭ بەرەكەلى بولۋىن تىلەسىن. سەبەبى كوز ءتيۋ - اقيقات، بار نارسە» ، - دەگەنىنە ساي ءاردايىم ءوزى، مالى، جاقىن ادامدارى ءۇشىن بەرەكە تىلەۋ.

2. «كوز تيەدى» دەپ قاۋىپتەنگەن نارسەنى جاسىرۋ.

3. جاقسىلىعىڭدى كورە الماۋشىنىڭ قىزعانىشىنا سابىر ەتۋ. ول جايىندا بىرەۋلەرگە شاعىمدانباۋ جانە اڭگىمە ەتپەۋ.

4. اللاعا تاۋەكەل ەتۋ. كوز تيۋدەن ساقتانۋ ماقساتىندا اللا تاعالانى وزىنە قورعانىش ەتۋ.

5. كوپ ساداقا بەرىپ، يگى امال ىستەۋ. جاقسى امالداردى كوپ ىستەۋ - كوز تيۋگە قارسى كەرەمەت توسقاۋىل.

6. كورەالماۋشىنىڭ قىزعانىشىنا جاقسىلىقپەن جاۋاپ بەرۋ.

7. كورەالماۋشىنىڭ قىزعانىشىن ەلەمەۋ جانە كوز تيۋدەن قورىقپاۋ. عالىمداردىڭ پىكىرىنشە، بۇل - كوز تيۋگە قارسى ەڭ كۇشتى قارۋ.

 

islam.kz