اقمولا وبلىسىندا 7 سوتتالۋشى راقىمشىلىقتان باس تارتۋدا
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق قىلمىستىق اتقارۋ جۇيەسى دەپارتامەنتى باسشىسىنىڭ ورىنباسارى سەرىك بۇلانوۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
ونىڭ ايتۋىنشا، راقىمشىلىققا جەڭىل دارەجەدەگى قىلمىس جاساعاندار مەن كامەلەتتىك جاسقا تولماعاندار، جاس مولشەرى 60 تان اسقان ەرلەر مەن ايەلدەر جانە مۇگەدەكتەر ىلىگەدى. ال اسا اۋىر قىلمىس جاساعاندار مەن بۇرىن راقىمشىلىق زاڭىنىڭ مۇمكىندىگىن پايدالانعانداردا مەرزىمىنەن بۇرىن بوستاندىققا شىعۋ نەمەسە جازا مەرزىمىن شەگەرۋ مۇمكىندىگى جوق كورىنەدى. تەك، اۋىر قىلمىس جاساعانداردىڭ جازاسىنىڭ مەرزىمى عانا قىسقارتىلۋى مۇمكىن.
«وبلىس اۋماعىنداعى 7 تۇزەۋ مەكەمەسىندە ءۇش مىڭنان استام ادام جازاسىن وتەپ جاتىر. راقىمشىلىق زاڭىنا بايلانىستى 228 ادامنىڭ مەرزىمىنەن بۇرىن بوساتىلۋعا نەمەسە جازا مەرزىمىن قىسقارتۋعا مۇمكىندىگى بار ەكەن. وعان قوسا، شارتتى تۇردە سوتتالىپ، وقشاۋلانباي تىركەۋدە تۇرعانداردىڭ اراسىندا 733 ادام راقىمشىلىققا ىلىنبەك. قازىرگى كۇنى دەپارتامەنت راقىمشىلىققا جاتاتىن 179 سوتتالۋشىنىڭ ىستەرىن سوتقا جىبەرگەن. الايدا، 7 سوتتالۋشى مەرزىمىنەن بۇرىن بوستاندىققا شىعۋ مۇمكىندىگىن پايدالانۋ ءۇشىن ارىز بەرمەگەن»، - دەپ ءتۇسىندىردى سەرىك بۇلانوۆ.
