بىلتىر الەۋمەتتىك سالاعا باعىتتالعان شىعىستار جالپى ىشكى ءونىمنىڭ 7 پايىزىنا دەيىن وسكەن
بۇگىن پارلامەنت ءماجىلىسىنىڭ جالپى وتىرىسىندا 2015 - جىلعى رەسپۋبليكالىق بيۋدجەتتىڭ اتقارىلۋى تۋرالى ۇكىمەت ەسەبى اياسىندا بايانداما جاساعان قارجى ءمينيسترى باقىت سۇلتانوۆ وسىلاي مالىمدەدى.
ءمينيستردىڭ ايتۋىنشا، بيۋدجەتتىڭ اتقارىلۋىن تالقىلاۋلار بارىسىندا نەگىزگى سۇراقتار الەۋمەتتىك سالا بويىنشا قويىلعان. «ەسەپتى جىلى الەۋمەتتىك سالاعا ارنالعان شىعىستار جالپى ىشكى ءونىمنىڭ 7 پايىزىنا دەيىن ءوستى جانە 2,8 تريلليون تەڭگەنى قۇرادى. بيۋدجەتتە ولاردىڭ ۇلەسى 39,4 پايىزعا دەيىن ارتتى. زەينەتاقى 1 ميلليون 943 مىڭ الۋشىلارعا ۋاقتىلى جانە تولىق كولەمدە تولەندى. ءبىر جاسقا دەيىن بالا كۇتىمى بويىنشا دەمالىس كەزەڭىندە 87 مىڭ ادامنىڭ مىندەتتى زەينەتاقى جارنالارى 3,6 ميلليارد تەڭگەگە سۋبسيديالاندى»، - دەدى قارجى ءمينيسترى.
ونىڭ سوزىنە قاراعاندا، تەگىن كەپىلدەندىرىلگەن مەديتسينالىق كومەككە بولىنگەن نىسانالى ترانسفەرتتەر 311 ميلليارد تەڭگەگە يگەرىلگەن. وسى سومادان 4 ميلليارد تەڭگە اۋرۋلاردى ەرتە ايقىنداۋ جونىندەگى ءىس- شارالارعا باعىتتالدى. 2015 -جىلى 6 ميلليوننان استام حالىقتىڭ ەرەسەك بولىگى تەكسەرۋدەن ءوتتى، بۇل سان الدىڭعى جوسپاردان 1,2 پايىزعا ارتىق. «بالاباقشالاردا ورىندارمەن قامتاماسىز ەتۋ 2014 -جىلمەن سالىستىرعاندا شامامەن 21 پايىزعا ءوستى. 3 جاستان 6 جاسقا دەيىنگى بالالاردى مەكتەپكە دەيىنگى تاربيەمەن جانە وقۋمەن قامتۋ دەڭگەيى شامامەن 82 پايىزدى قۇرادى نەمەسە 2014 -جىلعا قاراعاندا 3 پايىزعا ارتىق»، - دەدى ب. سۇلتانوۆ.
ونىڭ مالىمەتىنشە، جاڭا 130 مەكتەپ پايدالانۋعا ەنگىزىلدى، ونىڭ ىشىندە 58 ءى وقۋشىلار ورىندارىنىڭ تاپشىلىعىن جويۋ شەڭبەرىندە سالىنعان. «مەملەكەتتىك تاپسىرىس بويىنشا وقىتىلعان تەحنيكالىق جانە كاسىبي ءبىلىم الۋ تۇلەكتەرىنىڭ 78 پايىزى جۇمىسقا ورنالاستىرىلدى. عىلىم سالاسىنا 2015 - جىلى 43 ميلليارد تەڭگە باعىتتالدى، ول الدىڭعى جىلعا قاراعاندا 5 ميلليارد تەڭگەگە از. وسىمەن بىرگە، عىلىمدى گرانتتىق جانە باعدارلامالىق- نىسانالى قارجىلاندىرۋدىڭ جاڭا تەتىكتەرىنە كوشۋ جۇزەگە اسىرىلادى. بۇگىنگى تاڭدا عىلىمعا بولىنگەن اقشانىڭ 20 پايىزى بيزنەسكە كەرەكتى ناقتى ازىرلەمەلەرگە باعىتتالۋدا. زەرتتەۋلەردى كوممەرتسيالاندىرۋ وسەتىن بولادى»، - دەدى قارجى ءمينيسترى.
اۆتور: قانات مامەتقازى ۇلى
