قازاقستان تاريحى 7- سىنىپتان باستاپ قازاق تىلىندە وقىتىلاتىن بولدى

استانا. قازاقپارات - ب ع م- ءنىڭ مەكتەپكە دەيىنگى جانە ورتا ءبىلىم بەرۋ، اقپارتتىق تەحنولوگيالار دەپارتامەنتىنىڭ ديرەكتورى جاڭىل جونتايەۆا، قازاقستان تاريحىن قازاق تىلىندە، ال دۇنيەجۇزى تاريحىن ورىس تىلىندە وقۋ رەسپۋبليكا مەكتەپتەرىنە جەتىنشى سىنىپتان باستاپ ەنگىزىلەتىنىن ايتتى.

بۇل تۋرالى قازاقستان جاڭالىقتارى حابارلايدى.

«بۇل جىلى ءبىرىنشى سىنىپتا، باستاۋىش بولىمدە بارلىق پاندەر ءبىلىم الۋ تىلىندە جۇرگىزىلەدى. ەگەر مەكتەپ قازاق مەكتەبى بولسا - قازاق تىلىندە، ەگەر ورىس بولسا - ورىس تىلىندە، ۇيعىر بولسا - ۇيعىر تىلىندە»، - دەدى جونتايەۆا باسپا ءسوز ءماسليحاتى بارىسىندا.

ونىڭ ايتۋىنشا، نەگىزگى مەكتەپ بويىنشا كەزەڭمەن ءوتۋ جۇزەگە اسىرىلادى.

«بارلىق پاندەر ءبىلىم الۋ تىلىندە وتەدى. ءبىز جەتىنشى سىنىپتان باستاپ ءبىلىم الۋ تىلىنە قاراماستان قازاقستان تاريحىن قازاق تىلىندە، ال دۇنيەجۇزىلىك تاريحىن ورىس تىلىندە ءوتۋدى ۇسىنىپ وتىرمىز»، - دەدى جونتايەۆا.

«جوعارعى مەكتەپ بويىنشا توقتالىپ كەتكىم كەلىپ وتىر. بۇل جەردە اعىلشىن تىلىندە وتەتىن حيميا، فيزيكا بيولوگيا، اقپاراتتىق تەحنولوگيالاردان (ينفورماتيكا) باسقا بارلىق پاندەر ءبىلىم الۋ تىلىندە وقىتۋ ۇسىنىلادى»، - دەدى دەپارتامەنت ديرەكتورى.