21:12, 18 - ءساۋىر 2016 | GMT +5
توسىن تابيعات اپاتىنان 7 ادام قازا تاپتى
استانا. قازاقپارات - ۋرۋگۆايدا تولاسسىز جاۋعان جاڭبىر مەن تورنادونىڭ سالدارىنان 7 ادام مەرت بولدى.
بۇل تۋرالى ت ا س س اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
مەملەكەت پرەزيدەنتى تابارە ۆاسكەستىڭ ايتۋىنشا، 2057 ادام باسپانالارىن تاستاپ كەتۋگە ءماجبۇر بولعان. تابيعات اپاتىنان اسىرەسە، ەلدىڭ وڭتۇستىك- باتىسىندا ورنالاسقان سوريانو دەپارتامەنتىنە قاراستى دولورەس قالاسى زارداپ شەكتى.
وتكەن جۇما كۇنى بۇل ماڭايدا 4 ادام قازا تاۋىپ، 200 دەن استامى جاراقات العان. سونداي-اق، جۇزدەگەن عيماراتتار قيراپ قالدى. پوليتسيا قىزمەتكەرلەرى وسىنداي كەزدە ۇرلىقتى كاسىپ ەتكەن 5 ادامدى تۇتقىنعا الدى.
جەكسەنبى كۇنى اتالعان قالادا قازا تاپقاندارعا بايلانىستى قارالى كۇن جاريالاندى. توسىن تابيعات سىيىنان تاعى ءۇش ادام روچا، سەررو-لارگو جانە كانەلونەس دەپارتامەنتتەرىندە وپات بولدى.
ايان ءابدۋالي.
دەرەك، فوتو: تاسس.
