تارازدىق سپورتشى قول كۇرەستەن 7 جىل بويى جەڭىلىپ كورمەگەن امەريكالىقتى تىزە بۇكتىردى

استانا. قازاقپارات - جامبىلدىق سپورتشى ارمرەستلينگتەن «قۇرلىقارالىق چەمپيوندىق بەلبەۋىن» جەڭىپ الدى.

ول 7 جىل بويى ەشكىمگە جەڭىلىپ كورمەگەن امەريكالىق سپورتشىنى تىزە بۇكتىرىپ، چەمپيوندىق اتاققا يە بولدى.

ا ق ش- تىڭ لاس-ۆەگاس قالاسىندا وتكەن جارىستا ابسوليۋتتىك سالماقتا ونەر كورسەتكەن تارازدىق دميتري ترۋبين قارسىلاسى مايكل توددتان 4:2 ەسەبىمەن باسىم ءتۇستى. ال 2-6- ناۋرىز ارالىعىندا وسى ەلدە قول كۇرەستەن وتكەن «ارنولد كلاسسيك» حالىقارالىق تۋرنيرىندە ول بۇل جەتىستىگىن تاعى ءبىر مارتە قايتالاپ، قارسىلاستارىن مويىنداتتى، دەپ حابارلايدى 24.kz.

ايتا كەتۋ كەرەك، اتالعان جارىستا الەمنىڭ 40 ەلىنەن 500 گە تارتا سپورتشى باق سىناعان.

«تۋرنير وتە قيىن بولدى. اسىرەسە اقتىق سىنداعى قارسىلاسىم مىقتى، تاجىريبەلى سپورتشى ەدى. ونىڭ قول كۇرەستىرۋ ءادىسى ىڭعايسىز ءارى ءبىزدىڭ ەرەجەلەرگە سايكەس كەلمەيدى. ءبىراق بۇل جارىستا ونداي قۋلىقتار رۇقسات ەتىلە بەرەدى ەكەن. دەگەنمەن، ونىڭ وسال تۇسىن تاپتىم. ەلىمىزدىڭ كوك بايراعى امەريكا تورىندە كوتەرىلدى. مەن ءۇشىن بۇل ۇلكەن جەتىستىك. ەندى بۇل اۋىسپالى بەلبەۋدى ەلدە ۇستاپ قالۋ ءۇشىن بارىمدى سالامىن»، - دەيدى قول كۇرەستەن قۇرلىقارالىق چەمپيوندىق بەلبەۋ يەگەرى دميتري ترۋبين.