قىتايدا سوتتالعان 7 قازاقستاندىق ەلىمىزگە قايتارىلادى

استانا. قازاقپارات - اقپان ايىندا قىتايدا سوتتالعان جەتى قازاقستاندىق ازامات ەلىمىزگە قايتارىلماق.

 

بۇل تۋرالى بۇگىن سەناتتىڭ جالپى وتىرىسىنان كەيىن جۋرناليستەرگە بەرگەن سۇحباتىندا ق ر باس پروكۋرورىنىڭ ورىنباسارى يوگان مەركەل ءمالىم ەتتى.

«مەنىڭ بىلۋىمشە، قىتايدا 24 ادام (قازاقستاندىق رەد.) سوتتالعان. دەگەنمەن، ءبىز قازىرگە دەيىن وزىمىزدە وتەۋ ءۇشىن 5 ادامدى قايتاردىق، قازىرگى كۇنى 7 ازاماتتى قايتارۋ جۇمىستارى جۇرگىزىلۋدە»، - دەدى باس پروكۋروردىڭ ورىنباسارى جۋرناليستەر سۇراعىنا جاۋاپ بەرە كەلىپ.

ونىڭ ايتۋىنشا، اقپان ايىندا بەرىلەتىن 7 قازاقستاندىق ازاماتتىڭ ىشىندە 6 ەسىرتكى قىلمىسى بويىنشا جازاعا كەسىلگەندەر.

ەسكە سالا كەتەيىك، جالپى وتىرىستا قازاقستان مەن ءۇندىستان اراسىنداعى سوتتالعانداردى ءوزارا بەرۋ تۋرالى كەلىسىم قابىلدانعان بولاتىن.

اۆتور: قانات مامەتقازى ۇلى