الەمگە ايگىلى ءىرى كومپانيا 7 مىڭ قىزمەتكەرىن جۇمىستان بوساتپاقشى

استانا. قازاقپارات - جاپوندىق Toshiba كومپانياسى 7 مىڭ قىزمەتكەرىن جۇمىستان بوساتادى.

نەگىزىنەن تەلەديدار، جەكە كومپيۋتەر جانە تۇرمىستىق تەحنيكا شىعارۋ بولىمدەرىنىڭ جۇمىسشىلارى قىسقارتۋعا ىلىككەن، دەپ حابارلايدى «الماتى» تەلەارناسى «ىسكەرلەر ۋاقىتى» باعدارلاماسى.

اتالعان مەكەمە يندونەزياداعى زاۋىتى مەن توكيو ماڭىنداعى زەرتتەۋ كەشەنىن دە ساتۋعا ءماجبۇر. كومپانيا وكىلدەرى مۇنداي قادامعا قوماقتى شىعىننىڭ الدىن الۋ ءۇشىن بارىپ وتىرعاندارىن ايتادى. سەبەبى 2016 -جىلدىڭ 31 -ناۋرىزىنا دەيىنگى قارجى جوسپارىنا سايكەس، مەجەلى شىعىن 4 جارىم ميلليارد دوللارعا جەتۋى مۇمكىن.

شىلدە ايىندا كومپانيانىڭ كىرىس جونىندەگى ەسەبىندە پايدا كولەمىنىڭ دۇرىس كورسەتىلمەۋىنە بايلانىستى توشيبا داۋ- دامايدىڭ ورتاسىندا قالعان بولاتىن.