گۇلنۇر ورازباي قىزى «قاھارمان قايرات» داستانىن جازۋعا 7 جىلىن ارناعان
گۇلنۇر ورازباي قىزى - ارعى بەتتەن كەلگەن اعايىننىڭ ءبىرى. اتامەكەنگە ورالعالى ايتىس دودالارىنا قاتىسىپ تالايدى تامساندىردى.
اقىندىق - گۇلنۇر ءۇشىن جان قالاۋى. نەگىزگى ماماندىعى - مەيىربيكە. قازىر تالدىقورعان قالالىق جۇمىسپەن قامتۋ جانە الەۋمەتتىك باعدارلامالار بولىمىندە قىزمەت اتقارادى. مۇمكىندىگى شەكتەۋلى بالالارعا الەۋمەتتىك كومەك كورسەتەدى. دەسە دە، قاۋىرت جۇمىستان قولى قالت ەتسە بولدى، بوس ۋاقىتىن شىعارماشىلىققا ارنايدى. اللا بەرگەن ونەرىنىڭ ارقاسىندا رەسپۋبليكالىق، وبلىستىق دەڭگەيدە جۇلدە سالىپ، جەڭىمپاز اتاندى. ال، "قاھارمان قايرات" جيناعى - ونىڭ العاشقى كىتابى.
گۇلنۇر ورازباي قىزى "قاھارمان قايرات" كىتابىنىڭ اۆتورى:
مەن كوپتەن ويلاندىم، تولعاندىم. مەن جەلتوقسان كوتەرىلىسى، جەلتوقسان كوتەرىلىسى دەپ ەستيمىن. ءبىراق بۇل وقيعانى تۇسىنە بەرمەدىم. تۇسىنبەي مەن كوپتەگەن شىعارمالاردى، كوپتەگەن دەرەكتەردى ىزدەستىردىم. كەيىنگى ۇرپاققا قيىن ەكەن ويلاپ كورسەم. سول ءۇشىن ءوزىمىزدىڭ قازاقتىڭ قارا ولەڭىمەن تىلگە جەڭىل كەيىنگى ۇرپاققا ۇعىنىقتى بولۋ ءۇشىن وسىنداي ءبىر داستان جازۋدى ويلاستىرىپ، ويلانىپ، تولعانىپ داستانىمدى جازدىم.
"قاھارمان قايرات" كىتابى الماتى وبلىسى اكىمىنىڭ قولداۋىمەن "مادەني مۇرا" باعدارلاماسىنىڭ اياسىندا جارىق كوردى. كىتاپ "سەزىم ۇشقىندارى"، "بالالارعا بازارلىق"، "قاھارمان قايرات" دەپ اتالاتىن نەگىزگى ءۇش بولىمنەن تۇرادى. ءبىرىنشىسى - اقىننىڭ ولەڭ- جىرلارىنا ارنالسا، ەكىنشىسى بالالارعا، سوڭعى ءبولىمى قايرات رىسقۇلبەكوۆتىڭ ءومىرى تۋرالى جازىلعان.
ءنۇسىپباي ءابدىراحىم الماتى وبلىستىق "جەتىسۋ" گازەتى باس رەداكتورىنىڭ ورىنباسارى:
جەلتوقسان وقيعاسى تۋرالى ونىڭ باستى كەيىپكەرى قايرات رىسقۇلبەكوۆ تۋرالى كوپ ايتىلدى عوي. بۇل ورايدا جاڭالىق تابا قويۋ قيىن. وزگەشە ءبىر دەرەكتەر كەلتىرە قويۋ دا قيىن. گۇلنۇردىڭ ءبىر جەتكەن جەتىستىگى دەپ ايتۋعا بولادى. وسى وقيعانىڭ ءوزىن بايانداي وتىرىپ، اقىندىق تۇرعىدان كەلىپ وزىندىك پوزيتسياسىمەن، وزىندىك كوزقاراسىن كەلتىرىپ، وقىرمان ءسۇيسىنىپ وقيتىنداي شىعارمانى دۇنيەگە كەلتىرگەنى.
قاليما ەركىن قىزى №4 ورتا مەكتەپ وقۋشىسى:
جاس اقىن بۋىننىڭ وكىلى رەتىندە وسى "قاھارمان قايرات" داستانىن وقي وتىرىپ، تاۋەلسىزدىك تۋرالى جالپى تۇسىنىگىمدى ودان ءارى تولىقتىردىم. جانە دە قايراتتىڭ حالقى ءۇشىن ايانباي كۇرەسىپ، جانىن پيدا ەتكەن كۇرەستەرىمەن تانىستىم. جانە دە مەن وسى اقىن اپايىمىزدى وزىمە ۇلگى تۇتام.
"قاھارمان قايرات" كىتابى 500 تارالىممەن جارىق كورىپ وتىر. باسىم بولىگى وبلىسىنداعى كىتاپحانالارعا تاراتىلىپ بەرىلدى. ايتا كەتۋ كەرەك، گۇلنۇر ورازباي قىزى اقىندىعىمەن قاتار، ۇستازدىق ەتىپ، بالالاردى ولەڭ- جىر جازۋعا باۋلىپ ءجۇر. الداعى ۋاقىتتا تاعى دا كىتاپ جازۋ جوسپارىندا بار.
ايگەرىم سەرىكحان قىزى
