بيىل قازاقستاندا قاتارىنان 7 جەتىمدەر ءۇيى جابىلعان
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا پرەزيدەنت جانىنداعى وتباسى جانە ايەلدەر ىستەرى جونىندەگى ۇلتتىق كوميسسيانىڭ مۇشەسى، «باۋىرجان» قوعامدىق قايىرىمدىلىق قورىنىڭ ديرەكتورى جۇلدىز وماربەكوۆا ءمالىم ەتتى.
وسىلايشا، قازاقستانداعى بالالار ءۇيىنىڭ سانى 195 تەن 188 گە دەيىن ازايعان.
«بيىل قازاقستان 7 جەتىمدەر ءۇيى جابىلدى. 2011 -جىلى ءبىزدىڭ قورىمىز «جەتىم بالالارعا نە كەرەك؟» دەگەن ساۋالناما جۇرگىزگەن. ساۋالناما قورىتىندىسى بويىنشا بالالارعا ەڭ كەرەگى - كوڭىل ەكەن.
وكىنىشكە وراي، جەتىمدەر ۇيىندە تاربيەشىلەر بارلىق بالاعا بىردەي كوڭىل ءبولىپ ۇلگەرمەيدى. وڭ مەن سولدى كۇندە ايتىپ وتىراتىن ادام جوق، سەبەبى، تاربيەشىلەردىڭ ۋاقىتى جوق. كەزىندە داريعا نۇرسۇلتان قىزى وتە دۇرىس ايتتى، كەڭەس ۇكىمەتىنەن قالعان 200-300 ورىندىق جەتىمدەر ءۇيىن جاۋىپ، ولاردىڭ ورنىنا شاعىن- شاعىن وتباسىلار قۇرۋ كەرەك. مىسالى، جامبىل وبلىسىندا 10 وتباسى تيپتەس ۇيلەر اشىلدى، قىزىلوردادا بالالار قالاشىعى سالىندى»، - دەيدى ج. وماربەكوۆا.
قايىرىمدىلىق قورىنىڭ باسشىسى تاعى ءبىر قۋانتارلىق جاڭالىق جەتكىزدى - قازاقستاندا جەتىم بالالاردىڭ سانى دا ازايىپ كەلەدى ەكەن. «جەتىم بالالاردىڭ سانى مىڭ بۇلدىرشىنگە كەمىدى. قازىر قازاقستان بويىنشا 32362 جەتىم بالا تىركەلگەن»، - دەپ تولىقتىردى ول.
اۆتور: كەنجەكەي توقتامۇرات قىزى
