استانا اۋەجايىنىڭ جاڭا تەرمينالى جىلىنا 7 ميلليون جولاۋشى قابىلداي الادى

بۇل تۋرالى قازاقپارات ءتىلشىسىنىڭ رەسمي ساۋالىنا جاۋاپ بەرە وتىرىپ، «Airport Management Group»  كومپانياسى حابارلادى.

جاڭا تەرمينالدىڭ سىزباسىنا ساي، عيماراتتىڭ جالپى اۋماعى 40 مىڭ شارشى مەتردى قۇرايدى. جاڭا تەرمينالدا 25 تىركەۋ ۇستەلى، يمميگراتسيالىق قىزمەت كورسەتەتىن 24 ۇستەل بولادى. سونىمەن قاتار، عيماراتتا جۇكتەردى وڭدەپ، جولاۋشىلارعا تاپسىراتىن 3 لەنتا بولادى. جاڭا تەرمينال جىلىنا 3,5 ميلليون جولاۋشىنى قابىلداي الادى. وسىلايشا، استانا حالىقارالىق اۋەجايى 2017-جىلعا قاراي جىلىنا 7 ميلليون جولاۋشىعا قىزمەت كورسەتۋگە قاۋقارلى بولادى.

«Mabco Constructions S.A»  كومپانياسى سالىپ جاتقان جاڭا تەرمينالدىڭ قۇرىلىسى 2017-جىلدىڭ ناۋرىزىندا اياقتالادى. 2016-جىلى جولاۋشىلار تەرمينالى سىرتى مەن ىشكى قۇرىلىسىن اياقتاپ، اۋەجايدىڭ ۇشۋ-قونۋ جولاقتارىن، ۇشاق تۇراقتارىن كۇردەلى جوندەۋدەن وتكىزۋ جوسپارلانۋدا.

«Airport Management Group» ج ش س 2013-جىلى قۇرىلعان جانە «قازاقستان تەمىر جولى» ۇ ك» ا ق قۇرىلىمىنداعى مەملەكەتتىك اۋەجايلاردىڭ جەلىسىن باسقاراتىن كومپانيا. كومپانيانىڭ ماقساتى - الەمنىڭ ۇزدىك تاجىريبەلەرىن ەنگىزۋ، اۋەجاي باسقارۋ سالاسىنداعى ستاندارتتار مەن تەحنولوگيالاردى جەتىلدىرۋ، سونداي-اق ترافيك پەن سەرۆيستى، قارجىلىق جاعدايدى جاقسارتۋ، اۆياتسيالىق قاۋىپسىزدىك پەن ۇشاقتاردىڭ قاۋىپسىزدىگىن باسقارۋ جۇيەسىن جاقسارتۋ، باقىلاۋ باعدارلامالارىن حالىقارالىق يكاو ستاندارتتارىنا تەڭەستەرۋ. 2014-جىلى استانا، كوكشەتاۋ، پەتروپاۆل، قوستاناي، شىمكەنت،  قىزىلوردا قالالارىنىڭ اۋەجايى وسى كومپانيانىڭ باسقارۋىنا بەرىلگەن. سونىمەن قاتار، كومپانيا ستراتەگيالىق ارىپتەس رەتىندە شۆەيتساريانىڭ «Zurich Airport International AG» كومپانياسىمەن جەتى جىلعا كەلىسىمشارت جاساعان.

اۆتور: كەنجەكەي توقتامۇرات قىزى