قايىققا جاي ءتۇسىپ، 7 ادام قازا تاپتى

استانا. قازاقپارات - ۇندىلىك بەكي وزەنىندە قايىققا جاي ءتۇسىپ، جەتى ادام قازا تاپتى.

ونىڭ ۇشەۋى بالا. وقيعا سەنبى كۇنى، 15 -تامىزدا، اسسام شتاتىندا ورىن الدى، دەپ حابارلادى Lenta.ru The New Indian Express-كە سىلتەمە جاساپ.

قايىقتا بولعان تاعى 21 ادامدى ءتۇرلى دارەجەدە كۇيىك شالدى.

جاپا شەككەندەردىڭ بارلىعى بارپەتا (Barpeta) قالاسىنىڭ اۋرۋحاناسىنا جەتكىزىلدى. ۇشەۋىنىڭ جاعدايى اۋىر.

ءۇندىستاندا ماۋسىم ايىنان قازان ايىنا دەيىن جاۋىن ماۋسىمى بولادى. بۇل كەزدە نايزاعاي دا ءجيى سوعادى. ماسەلەن، بيحار شتاتىندا جاي ءتۇسۋ سالدارىنان ءبىر كۇندە توعىز ادام قازا تاپتى.

الەۋمەتتىك قىزمەتكەرلەردىڭ باعالاۋىنشا، الەمدە جىل سايىن نايزاعاي سالدارىنان ورتاشا العاندا 24 مىڭ ادام اجال قۇشادى، سونىمەن قاتار 240 مىڭعا جۋىعى ءتۇرلى جاراقات الادى.