08:00, 11 - ماۋسىم 2015 | GMT +6
اقتوبە وبلىسىندا 7 مۇعالىم جالعان ديپلوممەن جۇمىس ىستەگەن
اقتوبە. قازاقپارات - اقتوبە وبلىسىنىڭ پروكۋرورلارى ءوڭىر مەكتەپتەرىندە مۇعالىمدەردىڭ جالعان ديپلومدارمەن جۇمىس ىستەۋدىڭ 7 فاكتىسىن انىقتادى.
اتاپ ايتقاندا، ىرعىز اۋدانىنداعى مەكتەپتەردىڭ بىرىندە جوعارى پەداگوگيكالىق ءبىلىمى جوق مۇعالىمدەر بىرنەشە جىل بويى ەڭبەك، گەوگرافيا جانە ورىس تىلىنەن ساباق بەرىپ كەلگەن. ولاردا الماتىداعى قازاق ۇلتتىق پەداگوگيكالىق ۋنيۆەرسيتەتىن ءبىتىردى دەلىنگەن جالعان ديپلومدار بولعان.
ال قوبدا اۋدانىندا اقتوبە مەملەكەتتىك ۋنيۆەرسيتەتىن ءبىتىردى دەگەن جالعان ديپلومى بار 4 وقىتۋشى اشكەرەلەندى. تەرگەۋ بارىسىندا مۇعالىمدەردىڭ وزدەرى ديپلومداردى ارا اعايىنداردان العاندىقتارىن مويىندادى.
بارلىق فاكتى بويىنشا قىلمىستىق ءىس قوزعالدى، ءبىراق وبلىستىق پروكۋراتۋرانىڭ وڭىردەگى الەۋمەتتىك-ەكونوميكالىق سالاداعى زاڭدىلىقتى قاداعالاۋ باسقارماسىنىڭ پروكۋرورى نۇربەك تۇرىشيەۆتىڭ تۇسىندىرۋىنشە، ءىستىڭ ءبارى ايىپتىلاردىڭ ماتەريالدىق شىعىنداردى وتەۋىنە بايلانىستى توقتاتىلعان.