16:14, 09 - ماۋسىم 2015 | GMT +6
بوس جۇمىس ورىندار جارمەڭكەسىنە 7 مىڭنان استام جاس مامان قاتىستى - فوتو
استانا. قازاقپارات - بۇگىن استانا قالاسىنىڭ تەحنيكالىق جانە كاسىبي ءبىلىم بەرۋ مەكەمەلەرىن بىتىرۋشىلەر ءۇشىن بوس جۇمىس ورىندار جارمەڭكەسى وتكىزىلدى.
شاراعا حالىققا قىزمەت كورسەتۋ، قوعامدىق تاماقتانۋ، مەديتسينا، زاڭ، اقپارات، ەكونوميكا سەكىلدى سالالار بويىنشا 7 مىڭنان استام مامان يەسى قاتىستى. بۇل تۋرالى ەلوردا اكىمدىگىنىڭ رەسمي سايتىندا حابارلادى.
بوس جۇمىس ورىندار جارمەڭكەسى استانا قالاسى ءبىلىم باسقارماسىنىڭ، جۇمىسپەن قامتۋ جانە الەۋمەتتىك باعدارلامالار باسقارماسىنىڭ جانە قالالىق كاسىپكەرلەر پالاتاسىنىڭ قولداۋىمەن ۇيىمداستىرىلدى. شاراعا ونەركاسىپ، بيزنەس جانە قىزمەت كورسەتۋ سالاسىنداعى 50 جۋىق ءىرى كومپانيا قاتىسىپ، جاس ماماندارعا بوس جۇمىس ورىندارىن ۇسىندى.
«شارانىڭ باستى ماقساتى - وقۋىن ەندى عانا ءتامامداعان جاس ماماندارعا جۇمىسقا ورنالاسۋعا جانە ءىرى مەكەمەلەرگە بىلىكتى مامان تابۋعا كومەكتەسۋ»، - دەيدى استانا قالاسى كاسىپكەرلەر پالاتاسىنىڭ وكىلى الميرا زاكيەۆا.