قازاقستاندىق پوليتسەيلەردىڭ ۇمتىلماس 7 ەرلىگى - فوتو
وكىنىشكە قاراي، ءبىزدىڭ قوعامدا ءتارتىپ ساقشىلارىنىڭ ەرلىگى كوپ ەسكەرىلە بەرمەيدى دەپ جازادى Gonzo.kz.
2012- جىلى دەپۋتات باقىتجان ەرتايەۆ قىزمەتتىك مىندەتىن اتقارۋ كەزىندە قازا تاپقان پوليتسەيلەردى ەسكە الۋ كۇنىن بەكىتۋدى ۇسىنعان.
وسىعان وراي، نازارلارىڭىزعا قازاقستاندىق پوليتسيا قىزمەتكەرلەرىنىڭ ەرلىگى تۋرالى 7 فاكتىنى ۇسىنامىز.
1. عازيز بايتاسوۆ، گراناتا بايلاعان تەرروريستى ءوز دەنەسىمەن جاۋىپ قالدى.
2011-جىلدىڭ 12- قاراشاسى كۇنى تاراز قالاسىندا ورىن العان لاڭكەستىك ارەكەتتەن 7 ادام قازا تاپتى. پوليتسيا كاپيتانى عازيز بايتاسوۆ ءتورت ءتارتىپ ساقشىسى مەن ەكى ازاماتقا وق اتقان لاڭكەس ماقسات قاريەۆتى قۇرىقتاۋ كەزىندە قازا تاپتى.
ول تەرروريستىڭ جەتىنشى قۇربانى بولاتىن. جاراقات العانىنا قاراماي، ول جارىلعىش زاتتى ىسكە قوسقان لاڭكەستى دەنەسىمەن جاۋىپ، اينالاسىنداعى ادامداردى قۇتقارىپ قالدى. قىزمەتتىك بورىشىن وتەۋ بارىسىندا قازا تاپقان عازيز بايتاسوۆقا «حالىق قاھارمانى» اتاعى مەن «التىن جۇلدىز» جانە «وتان» وردەندەرى بەرىلدى. 2012-جىلدىڭ 30- قازانى كۇنى كاپيتان بايتاسوۆتىڭ تۋعان جەرى بايزاق اۋدانىندا ەسكەرتكىش تاقتا اشىلدى.
2. قايرات جۇمابەكوۆ، 130 بالانىڭ ءومىرىن قۇتقاردى.
2008-جىلدىڭ 30- مامىرى كۇنى 130 بالا مىنگەن اۆتوبۋستار تىزبەگى جول پوليتسەيلەرىنىڭ باقىلاۋىمەن استانادا قاراعاندىعا قايتىپ كەلە جاتقان. پوليتسيا سەرجانتى قايرات جۇمابەكوۆ بالالار مىنگەن اۆتوبۋستىڭ قارسى بەتتەگى كولىكپەن سوقتىعىسۋىنا جول بەرمەي، ەرلىكپەن قازا تاپتى.
قايرات جۇمابەكوۆ وقيعا ورنىندا كوز جۇمسا، ونىڭ ارىپتەسى دميتري پۋگاچ اۋىر جاراقاتپەن اۋرۋحاناعا جەتكىزىلدى. ينسپەكتورلاردىڭ ەرلىگىنىڭ ارقاسىندا بارلىق بالالار امان قالىپ، ەشبىرى جاراقات الماعان. جاقىندا قايرات جۇمابەكوۆ وقىعان مەكتەپتە ەسكەرتكىش تاقتا اشىلدى جانە پوليتسەيدىڭ تۋعان اۋىلىندا وعان كوشە اتى بەرىلدى.
3. ارعىن قۋانوۆ، نۇرلان زاكەنوۆ، جول اپاتىنىڭ الدىن الۋ ءۇشىن وزدەرى سوققىنى وزدەرىنە قابىلدادى.
بىلتىر پاۆلودار وبلىسى، ەكىباستۇز قالاسىنىڭ پوليتسەيلەرى بالالار مىنگەن اۆتوبۋس پەن جولدىڭ قارسى بەتىنە وتكەن جەڭىل كولىك سوقتىعىسۋىنىڭ الدىن الدى. « قىزىلوردا - پاۆلودار» تاس جولىندا Toyota Mark II جەڭىل كولىگىنىڭ 27 جاستاعى جۇرگىزۋشىسى جولداعى كولىكتەردى باسىپ وزباق بولىپ، جول ەرەجەسىن ورەسكەل بۇزعان. سول كەزدە جەڭىل كولىك پەن اۆتوبۋس سوقتىعىسۋىنىڭ الدىن الماق بولعان جول پوليتسەيلەرى ارعىن قۋانوۆ پەن نۇرلان زاكەنوۆ سوققىنى وزدەرىنە قابىلداپ، بالالاردى امان الىپ قالدى.
4. زايىتجان ايۋپوۆ، 5 قاباتتى ءۇيدىڭ شاتىرىنان قۇلاعان ءسابيدى قاعىپ الدى.
2011-جىلدىڭ 2- قاراشاسى كۇنى الماتى قالاسىنىڭ ءپاترۋلدى پوليتسەيى 5 قاباتتى ءۇيدىڭ شاتىرىنان قۇلاعان 3 جاسار ءسابيدى قاعىپ الدى. ءۇيدىڭ شاتىرىنان سەكىرىپ، وزىنە قول جۇمساماق بولعان 35 جاستاعى ايەلدى «بوران-086» پاترۋلدى ەكيپاجىنىڭ مۇشەلەرى ويىنان اينىتىپ، جەرگە تۇسۋگە كوندىرمەك بولادى. وسى كەزدە اعا لەيتەنانت سەرىك جاپاروۆ پودەزد ارقىلى شاتىرعا كوتەرىلمەك بولسا، تاعى ءبىر اعا لەيتەنانت زايىتجان ايۋپوۆ ايەلدىڭ وقىس ارەكەتكە بارماۋىن قاداعالاپ تومەندە قالادى. الايدا، اشىنعان ايەلدىڭ قولىنان 3 جاسار بالا قۇلاپ ءتۇسىپ، كەيىن ايەلدىڭ ءوزى دە سەكىرىپ كەتەدى. قۋانىشقا قاراي، اعا لەيتەنانت ايۋپوۆ بىرنەشە سەكۋند ىشىندە تومەنگە قۇلديلاعان ءسابيدى قاعىپ الىپ، ءومىرىن ساقتاپ قالدى.
5. رۋسلان ەلۋتايەۆ، ءبىر وتباسى مەن قوناق بالالاردى ورتتەن قۇتقاردى.
وتكەن جىلدىڭ جەلتوقسان ايىندا تالدىقورعان قالالىق ءى ءى ب پوليتسيا ينسپەكتورى رۋسلان ەلۋتايەۆ تۇتاس ءبىر وتباسىنى بالالارىمەن بىرگە ورتەنگەن ۇيدەن الىپ شىقتى. ءورت كوكسۋ اۋدانى ماڭىنداعى بالپىق ءبي اۋىلىنداعى ءتورت وتباسى تۇراتىن ءبىرقاباتتى ۇيدە بولعان. ۇيدەگى پاتەرلەردىڭ بىرىندە 6-7 كىشكەنتاي بالانىڭ قاتىسۋىمەن مەرەكەلىك باسقوسۋ وتەدى. ال سول كۇنى جۇمىستان قايتىپ كەلە جاتقان پوليتسيا قىزمەتكەرى ءۇي ماڭىنداعى سارايدىڭ ورتەنىپ، جالىننىڭ ءۇيدى شارپىعانىن دا بايقاعان. رۋسلان ەلۋتايەۆ ۇيگە جۇگىرىپ كىرىپ بالالاردى، سودان سوڭ، گاز باللونىن سىرتقا شىعارعان. دەرەۋ ارىپتەستەرىن كومەككە شاقىرىپ، وزگە پاتەرلەر وتقا ورانباۋ ءۇشىن ءورتتى سوندىرۋگە ۇلكەن ۇلەس قوسقان.
6. ارمان سماعۇلوۆ، شۇڭقىرعا باتىپ بارا جاتقان جاسوسپىرىمدى امان الىپ قالدى.
2012-جىلى وسكەمەن قالاسىنداعى ءۇلبى اۋداندىق پوليتسيا بولىمشەسىنىڭ قىزمەتكەرى ارمان سماعۇلوۆ قازان شۇڭقىرعا باتىپ بارا جاتقان جاسوسپىرىمدى قۇتقارىپ قالدى. پوليتسيا لەيتەنانتى قازان شۇڭقىر ماڭىندا ويناپ جۇرگەن بالالاردى كورەدى. كەنەت مۇز ەرىپ، قازان شۇڭقىرعا باتپاق لاي جينالا باستايدى. ال قىردان سىرعاناپ كەلگەن جەنيا ەسىمدى جاسوسپىرىم باتپاققا ءتۇسىپ كەتكەن.
ارمان سماعۇلوۆ دەرەۋ كيىمدەرىن شەشىپ، جاسوسپىرىمنىڭ ارتىنان شۇڭقىرعا سەكىرەدى. سودان سوڭ، بار كۇشىن سالىپ سۋدان بالانى امان الىپ شىعادى. دارىگەرلەر ءۇش كۇن بويى جەنيانىڭ ءومىرى ءۇشىن كۇرەسىپ، ءۇشىنشى كۇن دەگەندە باتپاققا باتىپ كەتە جازداعان جاسوسپىرىم تىلگە كەلەدى. بۇل ارمان سماعۇلوۆتىڭ ءبىرىنشى ەرلىگى ەمەس. اسكەري بورىشىن وتەپ جۇرگەندە ول ءوزىنىڭ ارىپتەسىن ءولىم اۋزىنان امان الىپ قالعان.
7. ەرمەك دوسماعامبەتوۆ، ەكى قىزدى زورلىقتان قۇتقاردى.
ەكى جىل بۇرىن پوليتسيا كاپيتانى ەرمەك دوسماعامبەتوۆ جۇمىستان تىس ۋاقىتتا ءوز ءومىرىن قاۋىپكە تىگىپ، ەكى قىزدى كۇدىكتىلەردىڭ زورلاۋىنان امان الىپ قالادى. تۇنگى 2 لەر شاماسىندا باقتاعى ورىندىقتا دەمالىپ وتىرعان اپكەلى-ءسىڭلىلى ەكى قىزعا جاس جىگىتتەر تانىسپاق بولىپ، تيىسە باستايدى. ال وزدەرىمەن تانىسۋعا قىزداردىڭ نيەتى جوق ەكەنىن بىلگەندە، ولار كۇشتەپ زورلاماق بولادى. سول كەزدە جۇمىسىنان قايتىپ كەلە جاتقان ەرمەك دوسماعامبەتوۆ زورلاماق بولعان جىگىتتەردەن قىزداردى اراشالاپ قالادى. كۇدىكتىلەر پوليتسيا وكىلىنە پىشاق جاراقاتىن سالعانىمەن، كوپ ۇزاماي قولعا ءتۇستى.
Nur.kz
