قازاق ايتىسىنىڭ 7 تومدىعى جارىق كوردى

 استانا. قازاقپارات - استاناداعى ۇلتتىق اكادەميالىق كىتاپحانادا «نۇر وتان» پارتياسىنىڭ قولداۋىمەن «قازاق ونەرىنىڭ انتولوگياسى» جوباسى اياسىنداعى كەزەكتى باسىلىمنىڭ تۇساۋكەسۋ ءراسىمى ءوتتى.

جالپى 25 توم ەڭبەكتى قۇرايتىن جوبانىڭ اۆتورى -  مەملەكەت جانە قوعام قايراتكەرى، فيلولوگيا عىلىمدارىنىڭ دوكتورى مىرزاتاي جولداسبەكوۆ. مامانداردىڭ ايتۋىنشا العاش رەت قازاقتىڭ كونە ايتىسىنان باستاپ وسى زامانعا دەيىن قازىرگى ءسوز شەشەندىگى بايگەسىنىڭ ەڭ تاڭداۋلى ساتتەرىنىڭ باسى قوسىلىپ، جارىققا شىعىپ وتىر. اۋقىمدى ەڭبەكتىڭ ىشىندە اقىندار تۋرالى مالىمەت، تۇسىندىرمە سوزدىكتەر دە بار. قازاق ونەرى انتولوگياسىنىڭ 7 تومىنا شەتەلدەگى قانداستارىمىزدىڭ دا ايتىستارى ەنگىزىلگەن.

ءجۇرسىن ەرمان، اقىن: - ونىڭ ىشىندە قىتايداعى قازاق اقىندارى دەگەن ۇلكەن ءبىر شوعىر بار. قازىردىڭ وزىندە قىتايداعى قانداستارىمىزداردىڭ اراسىندا ايتىستىڭ بىزدەن كورى كوپ ەرەكشەلىگى بار. ويتكەنى، اۋەلى قالپىن ساقتاپ، ءسوزدى قۋالاپ، ۋاجبەن ايتىسىپ، سوزبەن جىعۋعا تىرىساتىن، ساياساتتان تىسقارى كوپ جەكپە- جەكتەر وسىندا كەزدەسەدى. م. اۋەزوۆ ايتىس دەگەن ءسوز بارىمتاسى دەسە، سول انىقتاماعا جاۋاپ بەرەتىن جاقسى ايتىستار وسى 7 تومدىقتىڭ ىشىندە جارىق كوردى.

kz 24