قازاقستاندا تاعى 7 ميلليونەر انىقتالدى
كاپيتالدى امنيستيالاۋ شاراسى العاشقى ناتيجەسىن دە كورسەتە باستادى.
بۇگىن سالىق كوميتەتى 4 ايعا جوسپارلانعان اكسيانىڭ ءبىر ايلىق ەسەبىن جاريا ەتتى. قورتىندىعا قاراعاندا، وسى شارانىڭ ءبىرىنشى كەزەڭىندە رەسپۋبليكا بويىنشا 2 مىڭ 371 ازاماتتان ءوتىنىش تۇسكەن. ازىرگە ولاردان بيۋدجەت اينالىمىنا 20 ميلليون تەڭگە كىرىپ وتىر.
سونداي-اق، 7 ادام كولەڭكەدە ساقتاعان 1 ميلليارد 400 ميلليون تەڭگەسىن بانك شوتتارىنا تاپسىرعان. جالپى، ۇكىمەت بۇل جولعى مۇلىك جاريالاۋ شاراسىنان 12 ميلليارد دوللار شاماسىندا قارجى الۋدى كوزدەپ وتىر.
ەگەر، ءسىز كولەڭكەلى بيزنەستەن تۇسكەن تابىس پەن مۇلىك يەسى بولساڭىز، ەندى زاڭسىز بايلىعىڭىزدى جاسىرۋدىڭ قاجەتى جوق. ياعني، اشىق تۇردە بارىڭىزدى جاريالاساڭىز، كاپيتالىڭىز كەشىرىمگە ىلىگۋى مۇمكىن. وعان ۇكىمەتتىڭ ءوزى كەپىلدىك بەرىپ وتىر. 1 - قىركۇيەكتەن باستاپ ەل ىشىندە وسىنداي ناۋقان ءجۇرىپ جاتىر. ال ماماندار ەل اراسىندا بۇل شارانى وزگە باعدارلامامەن شاتاستىرىپ جاتقانداردىڭ كوپ ەكەنىن ايتادى.
«قانداي وبەكتىلەر زاڭداستىرىلۋى كەرەك؟ ەڭ الدىمەن اقشا، باعالى قاعازدار، سوسىن بارىپ جىلجىمايتىن مۇلىكتەر. وندا دا زاڭسىز يەلەككە الىنعان. ءبىراق حالىق ونى قۇجات رەتتەۋمەن شاتاستىرۋدا. ءسويتىپ، شاشتاراز، شاعىن دۇكەن، اسحانا يەلەرى كەلىپ، قۇجاتتارىن رەتتەۋدى تالاپ ەتۋدە. ءبىراق بۇلار كاپيتال جاريالاۋ ساناتىنا جاتپايدى»، - دەدى سالىق كوميتەتىنىڭ ءتوراعاسى ءانۋار جۇمادىلدايەۆ.
ال ۇكىمەتتىڭ نەگىزگى كوزدەگەنى - اقشانى جاريالاۋ. ۇلتتىق بانك ەسەبىنە قاراعاندا، ناۋقان باستالعان ءبىر اي ىشىندە 9 ادام قارجىسىن زاڭداستىرۋعا كەلگەن.
«ءبىر اي ىشىندە ەكىنشى دەڭگەيلىك بانككە 9 ادامنىڭ ەسەبىنەن شوت اشىلدى. شامامەن 1 ميلليارد 553 ميلليون تەڭگە ءتۇستى. تاعى دا قاتارى كوبەيەدى دەگەن نيەتتەمىز. ەگەر وسى كىسىلەر شوتىنان مەرزىمىنەن بۇرىن اقشاسىن الار بولسا، 10 پايىزدىق سالىق تولەپ اقشاسىن كەرى قايتارۋىنا بولادى»، - دەدى ۇلتتىق بانكتىڭ ءبولىم باستىعى كەرىمقۇل ەسبولاتوۆ.
قارجىگەرلەر جاريالاۋ تيىمدىلىگىنىڭ 3 شارتىن ۇسىنۋدا. ءبىرىنشى، جاريالانعان اقشا بانك شوتىنا تۇسسە، نارىقتىق مولشەرگە ساي پايىزدىق سىياقىعا يە بولماق. 3 جىلدىق كەپىلمەن. ەكىنشى، ينۆەستيسياعا ءتۇسىپ، يەسىنە پايدا اكەلەۋى مۇمكىن. ءۇشىنشى، IPO باعدارلاماسىنا قاتىسۋعا رۇقسات بەرىلمەك. ەڭ باستىسى، امنيستياعا تۇسكەن كاپيتال ءۇشىن ەشكىم ءىستى بولمايدى. ءبىراق قوعام اراسىندا داۋ تۋعىزىپ وتىرعان دا اكتسيانىڭ ءدال وسى تۇسى.
«ءبىر قيىندىق، بۇل جەردە زاڭداستىرۋ بىتكەن سوڭ نە بولاتىنى بەلگىسىز. سەنىم جوق. مىنە، سوندىقتان دا ەشكىم مول قارجىسىن اشىپ كورسەتە قويماۋى مۇمكىن. اسىرەسە، وليگارحتار. سوندىقتان ۇكىمەتتىڭ جوسپارلاعان 12 ميلليارد دوللاردى جيناۋى ەكىتالاي. ال نەگىزى بەيرەسمي اقپار بويىنشا، افشورلىق جولمەن قازاقستاننىڭ 130 ميلليارد دوللارى سىرتتا جاتىر»، - دەدى ساياساتتانۋشى دوسىم ساتبايەۆ.
تاۋەلسىز قازاقستان تاريحىندا بۇل وسىمەن 3 مارتە جاريالانىپ وتىرعان كاپيتال امنيستياسى. امنيستيا ءبىرىنشى 2001 -جىلى، بيۋدجەتكە 480 ميلليون دوللار كىرىسپەن جاسالسا، 2006-2007 -جىلدارى بۇل سوما بىردەن 14 پايىزعا وسكەن. ءسويتىپ، 6,8 ميلليارد دوللار زاڭداستىرىلعان.
BNews.kz
