التايدا 7 - عاسىردا ءومىر سۇرگەن ساربازدىڭ سۇيەگى مەن ونىڭ قوبىزعا ۇقساس اسپابى تابىلدى

استانا. قازاقپارات - بەلگىلى ارحەولوگ، تاريح عىلىمدارىنىڭ دوكتورى زەينوللا ساماشيەۆتىڭ جەتەكشىلىگىمەن جۇرگىزىلگەن التايداعى ارحەولوگيالىق قازبا جۇمىستارى بارىسىندا شامامەن VII عاسىردا ءومىر سۇرگەن 40 جاستاعى ساربازدىڭ سۇيەگى تابىلدى.

بۇل تۋرالى تۇركى اكادەمياسىنىڭ باسپا ءسوز قىزمەتىنەن حابارلاندى.

«جاۋىنگەردىڭ دەنەسىنىڭ قاسىنان VII عاسىرعا تيەسىلى قارۋ-جاراعى اتاپ ايتقاندا، دۋلىعا، ساداق، جەبە، قورامساق، قىلىش سونىمەن قاتار، اتتىڭ سۇيەكتەرى مەن التىن جالاتىلعان ەر-تۇرمان، جۇگەن تابىلدى. سونداي-اق، ساربازدىڭ قاسىنا قوبىزعا ۇقساس مۋزىكالىق اسپاپتىڭ قويىلۋى ارحەولوگيالىق قازبا جۇمىسىنىڭ باستى جاڭالىعى بولىپ وتىر»، - دەلىنگەن باسپا ءسوز بايانىندا.

ەسكەرتكىش تۇركى اكادەمياسىنىڭ «باتىس تۇرىك قاعاناتىنىڭ مەملەكەتتىك قۇرىلىمى» اتتى عىلىمي-زەرتتەۋ جوباسى نەگىزىندە قازىلعان. بۇعان دەيىن «بەرەل» قورىمىنان مول جادىگەر تاپقان بەلگىلى ارحەولوگ زەينوللا ساماشيەۆ ارحەولوگ عالىمدارمەن بىرگە جۇرگىزىلگەن العاشقى ساراپتامالار ناتيجەسى جاۋىنگەردى شامامەن VII عاسىردا ءومىر سۇرگەن دەپ بولجاپ وتىر.

«ادام مەن اتتىڭ سۇيەگى وتە جاقسى ساقتالعان. بۇل سۇيەك - قاتارداعى ساربازدىكى ەمەس، جىراۋ نەمەسە قوعامدا جوعارى مارتەبەگە يە بولعان ادامدىكى بولۋى كادىك»، - دەيدى ول.

ءبىر قىزىعى، ءدال وسى وڭىردەن بىلتىر اتالعان عالىمنىڭ ارحەولوگيالىق توبى ەكى كونە اسپاپ ءتۇرىن تاپقان بولاتىن. تاريحي ولجانىڭ ناقتى ءداۋىرى تۇركى اكادەمياسى جانىندا جۇرگىزىلەتىن ارنايى ساراپتامالاردان كەيىن انىقتالادى.

اۆتور: قانات مامەتقازى ۇلى