نيگەريالىقتىڭ اسقازانىنان 79 مىڭ ەۋرو تابىلدى
استانا. قازاقپارات - فرانسياداعى ستراسبۋرگتە كەدەنشىلەر ءىرى سوماداعى اقشانى وتكىزۋگە ارەكەتتەنگەن نيگەريالىقتى قولعا ءتۇسىردى.
افريكالىق ازامات قالالىق اۆتوۆوكزال ماڭىندا كەزدەيسوق ۇستالعان. ونى ەسىرتكى ءيسىن سەزگەن ءيىسشىل ءيتتىڭ كومەگىمەن قولعا تۇسىرگەن. تەكسەرە كەلگەندە ونىڭ قالتالارى مەن شۇلىقتارىنان 13 مىڭ شۆەيتساريالىق فرانك شىققان. ۇستالعان ازامات بۇل اقشانى يسپاندىق كۋرورتتاردىڭ بىرىندەگى مەيرامحانادا ىدىس جۋۋشى بولىپ ەڭبەك ەتكەندە تاپقاندىعىن ايتقان. ءبىراق كەدەنشىلەر قوسىمشا تەكسەرۋگە ۇيعارىپ، ونى رەنتگەنگە تۇسىرگەن.
كۇدىكتىنىڭ اسقازانىنان مول اقشانىڭ بار ەكەندىگى كورىندى. قورىتىندىسىندا 200 جانە 500 ەۋرو سالىنعان بىرنەشە شاعىن قالتالار شىقتى. ساناي كەلگەندە ول 79 مىڭ ەۋروعا جەتكەن. قازىر نيگەريالىق قاماۋعا الىندى. وعان كونتراباندا جانە اقشانى جىلىستاتۋ بويىنشا ايىپ تاعىلدى، دەپ حابارلايدى BFMTV.
اۆتور: ەرلان قوجاكەلديەۆ
