ەلوردادا استانا كۇنى 79 ءسابي دۇنيەگە كەلدى

استانا. قازاقپارات - استانا كۇنى اياسىندا ەلوردادا 100 دەن استام مەرەكەلىك شارا ءوتتى. ءداستۇرلى مەرەكەلىك باعدارلامالاردان بولەك قالا تۇرعىندارى مەن قوناقتارى جاۋىنگەرلىك ونەر فەستيۆالىن، ۇرمەلى اسپاپتار وركەسترلەرى فەستيۆالىن، يلليۋزيونيستەر شوۋى مەن «نۇرلى ەسىل» لازەرلىك- پيروتەحنيكالىق شوۋىن تاماشالادى.

قالا كوشەلەرىندە ەتنواۋىلدار مەن ЗD قالاشىقتار تىگىلىپ، ەسىل وزەنىنىڭ جاعالاۋىندا ءتۇرلى ۇلتتاردىڭ مادەنيەتىمەن تانىسۋعا مۇمكىندىك بولدى. استانا اسپانىندا جۇزدەگەن شار مەن باتپىراۋىق قالىقتاپ، ساياباقتاردا اۋقىمدى فەستيۆالدار مەن حالىقتىق سەرۋەن ءوتتى.

استانا قالاسى دەنساۋلىق ساقتاۋ باسقارماسىنىڭ حابارلاۋىنشا، بيىل استانا كۇنىندە ەلوردادا 79 ءسابي دۇنيە ەسىگىن اشتى، سونىڭ ىشىندە 28 قىز، 51 ۇل.

ايتا كەتەيىك، بىلتىر وسى كۇنى 61 ءسابي: 33 ۇل جانە 28 قىز تۋعان بولاتىن، دەپ جازادى ەلوردا اكىمدىگىنىڭ رەسمي سايتى.

2015 -جىلعى 1 -مامىرداعى جاعداي بويىنشا، استانا قالاسى تۇرعىندارىنىڭ سانى 860368 ادامدى قۇرادى، ونىڭ ىشىندە «الماتى» اۋدانى بويىنشا - 380449 (%44,2)، «ەسىل» اۋدانىندا - 130669 (%15,2)، «سارى ارقا» اۋدانىندا - 349250 (%40,6) ادام.