باتىس قازاقستاندا سايلاۋشىلاردىڭ 79,01 پايىزى داۋىس بەردى

ورال. قازاقپارات - باتىس قازاقستان وبلىسىندا جەرگىلىكتى ساعات 16:00 گە دەيىن 404465 سايلاۋشىنىڭ 319568 ى نەمەسە 79,01 پايىزى داۋىس بەردى.

وبلىستىق سايلاۋ كوميسسياسىنان تۇسكەن مالىمەتكە قاراعاندا، ورال قالاسىندا 199639 سايلاۋشىنىڭ 153722 سى نەمەسە 77,00 پايىزى ءوز تاڭداۋلارىن جاساپ ۇلگەردى. اۋداندار بويىنشا شىڭعىرلاۋ (82,60 پايىز)، اقجايىق (82,41 پايىز)، جاڭاقالا (81,53 پايىز) اۋداندارىندا بەلسەندىلىك جوعارى.

ايتا كەتەيىك، سايلاۋ بارىسىن مىڭنان استام بايقاۋشىلار باقىلاۋدا. رەسەيدەن كەلگەن حالىقارالىق بايقاۋشى يۋريي ريابوۆتىڭ سوزىنە قاراعاندا، ءوزى باقىلاپ وتىرعان ورال قالاسىنداعى №521 سايلاۋ ۋچاسكەسىندە سايلاۋشىلارعا بارلىق جاعداي جاسالعان. مۇندا تاڭەرتەڭنەن باستاپ مەرەكەلىك كوڭىل-كۇيمەن كەلگەن ءار ازامات ءوز تاڭداۋلارىن جاساۋدا. سايلاۋعا بايلانىستى زاڭبۇزۋشىلىق بايقالعان جوق.

جالپى، وڭىردە سايلاۋ ويداعىداي وتۋدە.

اۆتور: ەلجان ەرالى