جازعى وليمپياداعا 78 كۇن قالدى. دوداعا دايىنبىز با؟
وسىدان كەيىن جەنيەۆا ارقىلى برازيلياعا اپارىلدى. مامىردىڭ 3 ىنەن بەرى الاۋ ەستافەتاسى ەلدىڭ بۇكىل اۋماعىن ارالاپ ءجۇر. وسى 95 كۇننىڭ ىشىندە 83 قالا مەن 500 دەن استام قالاشىقتاردى جاعالاپ وتەتىن وتتى تىعىرشىق ءدال 5 تامىزدا ريو-دە-جانەيروداعى اتاقتى «ماراكانا» ستاديونىنا جەتكىزىلەدى.
ال بۇل ارالىقتا كەزەكتى XXXI جازعى وليمپيا ويىندارىنىڭ ءالى تاراتىلماعان جولدامالارىن جەڭىپ الۋ جولىنداعى جارىستار جاھاننىڭ تۇكپىر-تۇكپىرىندە قىزۋ ءجۇرىپ جاتىر. وسى كەزگە دەيىن قازاقستان سپورتشىلارى ايتۋلى الامانعا سپورتتىڭ 22 تۇرىنەن 82 ليتسەنزيا جەڭىپ الىپ ۇلگەردى. الداعى ۋاقىتتاردا بۇلاردىڭ سانى تاعى دا ارتا ءتۇسۋى ءتيىس.
استانالىقتار وليمپياداعا قۇرمەت كورسەتتى
استانادا ريو- دە-جانەيرو وليمپيالىق ويىندارىنىڭ قۇرمەتىنە ارنالعان سپورتتىق شارا وتكىزىلدى. وعان مادەنيەت جانە سپورت ءمينيسترى ارىستانبەك مۇحامەدي ۇلى، ۇلتتىق وليمپيادا كوميتەتىنىڭ باس حاتشىسى دانيار ءابىلعازين جانە قالا اكىمى ادىلبەك جاقسىبەكوۆ باستاعان لاۋازىمدى تۇلعالار كەلدى.
ءتورت جىلدا ءبىر اينالىپ كەلەتىن سيكلدىق سپورت جارىسى قۇرمەتىنە ۇيىمداستىرىلعان ايتۋلى اكتسيانى تاماشالاۋ ءۇشىن قالانىڭ كوپتەگەن تۇرعىندارى جينالدى. ولار وسى الاماندا ەلىمىزدىڭ نامىسىن قورعايتىن سپورتشىلارىمىزعا قۋاتتى قولداۋ كورسەتۋ ءۇشىن كەلدى. جانكۇيەر جۇرت شارا بارىسىندا ءبىرقاتار ساڭلاقتارىمىزدىڭ ونەرلەرىن تاماشالاپ، ءتۇرلى جارىستار مەن شەبەرلىك دارىستەرىنە قاتىستى. سول ساتتەرى «حان شاتىر» ساۋدا-ويىن-ساۋىق ورتالىعىنىڭ ماڭى ناعىز سپورتتىق الاڭعا اينالىپ كەتتى.
كوپشىلىك الدىندا ءسوز سويلەگەن قالا اكىمى ادىلبەك جاقسىبەكوۆ وليمپياداشىلاردى ءتورتجىلدىقتىڭ باستى دوداسى باستالاتىن شاقتىڭ جاقىن قالۋىمەن قۇتتىقتاي وتىرىپ، سپورتشىلارعا باسىرەلى باسەكەلەردە تابىس بيىگىنەن كورىنۋدى تىلەدى، ال جينالعانداردى سپورتپەن اينالىسۋعا شاقىردى.
«مەن قازاقستان سپورتشىلارىنىڭ وليمپيا ويىندارىندا جوعارى ناتيجەگە قول جەتكىزە الاتىنىنا سەنەمىن. ولارعا ساتتىلىك جانە دەنساۋلىق تىلەيمىن. بۇل - الەمدەگى ەڭ ەلەۋلى جانە اۋقىمدى شارالاردىڭ ءبىرى. قازىرگە دەيىن ءبىزدىڭ سپورتشىلارىمىز وليمپيادانىڭ 82 جولداماسىنا قول جەتكىزىپ وتىر. ەلىمىزدە پرەزيدەنتتىڭ تاپسىرماسىمەن سپورتشىلار ءۇشىن بارلىق جاعداي جاسالعان، سوندىقتان ولار جاقسى ناتيجە كورسەتەدى دەپ سەنەمىز. ءبىز ءوز كەزەگىمىزدە ولاردى قولداپ، دەمەۋ كورسەتەتىن بولامىز»، - دەدى قالا باسشىسى.
جيىندا استانا سپورتشىلارىنىڭ الداعى مەجەلەرى تۋرالى دا ايتىلدى. كۇنى بۇگىنگە دەيىن ولار سپورتتىڭ 8 ءتۇرى بويىنشا 13 ليتسەنزيا جەڭىپ العان. ال الداعى ۋاقىتتا بۇلاردىڭ سانى ءالى دە ارتا تۇسەتىن بولادى.
اقتوبە دە جولداما تاراتقالى وتىر
اقتوبەدەگى «دوستىق» سۋ سپورتى ورتالىعىندا جۇزۋدەن ەلىمىزدىڭ چەمپيوناتى سورەدەن شىقتى. بۇل جارىستىڭ ەرەكشەلىگى سول، اشىق سيپاتتا وتەتىن وعان رەسەي، بەلارۋس جانە وزبەكستان ەلدەرىنىڭ دە سپورتشىلارى قاتىسىپ جاتىر. ولار وسىندا 5 كۇنگە سوزىلاتىن جارىس بارىسىندا ريو وليمپياداسىنىڭ ليتسەنزياسى ءۇشىن كۇرەسۋدە.
وسىلايشا، تامىز ايى بويى دەرلىك برازيليادا كورىك قىزدىراتىن جازعى وليمپيا ويىندارىنا قاتىسۋ قۇقىعىن بەرەتىن ليتسەنزيالاردى جەڭىپ الۋ باسەكەسى باستالىپ كەتتى. جارىس سۋ سپورتى تۇرلەرى بويىنشا حالىقارالىق فەدەراتسياسىنىڭ (ف ي ن ا) ماقۇلداۋىمەن وتۋدە. سايىستى باقىلاۋعا قازاقستان مادەنيەت جانە سپورت مينيسترلىگىنىڭ ارنايى وكىلدەرى كەلدى.
- چەمپيوناتقا بارلىعى 17 كوماندا كەلدى. بىزدەن باستى ۇمىتكەرلەر قاتارىندا الەكساندر تارابين، سابىر المات، ايبەك جانە الىبەك قامزەنوۆتەر، ەكاتەرينا رۋدەنكو، ءادىل قاسقاباي سەكىلدى ساڭلاقتارىمىز بار. اشىق چەمپيوناتقا قاتىسۋشىلاردىڭ ونەرلەرىن باعالاۋشىلار ساپىنا حالىقارالىق فەدەراتسيانىڭ رەسمي تورەشىسى ۆ. ماكاريەۆيچ تە قوسىلدى، - دەيدى مادەنيەت جانە سپورت مينيسترلىگىنىڭ سپورت جانە دەنەشىنىقتىرۋ كوميتەتى ءتوراعاسىنىڭ ورىنباسارى سەرىك جاراسبايەۆ.
مۇندا جارىستىڭ تۇرىنەن ليتسەنزيالار تاعدىرى شەشىلەدى.
قۇرامانىڭ جاڭا فورماسى دايىن
بيىلعى ناۋرىز ايىندا استانادا قازاقستان ۇلتتىق وليمپيادا كوميتەتىنىڭ كەزەكتەن تىس سەزى ءوتتى. ونىڭ بارىسىندا 2016-جىلعى ريو جازعى وليمپيا ويىندارىنا قاتىساتىن سپورتشىلارىمىزدىڭ پارادتىق جانە سپورتتىق فورمالارىنىڭ تۇساۋكەسەرى بولدى.
بۇل جولى جاڭا فورمادا رەسپۋبليكا ءۇشىن ءداستۇرلى سانالىپ كەلگەن ءتۇرلى-ءتۇستى بوياۋلاردان باس تارتۋعا شەشىم قابىلداندى. «قاز جەڭىل ونەركاسىپ- الماتى» كيىم تىگۋ كاسىپورنىنىڭ ديرەكتورى ايبەك بەكتۇرعانوۆتىڭ ايتۋىنشا، پارادتىق وليمپيالىق كيىمدەردى تىگۋگە تابيعي جىپتەردەن توقىلعان جوعارى ساپالى ماتالار پايدالانىلعان.
«ەرلەردىڭ پارادتىق فورماسى قۇرامىنا پيدجاك، جەيدە، گالستۋك، تۋفلي، جول سومكەسى جانە قولشاتىر كىردى. ال ايەلدەر كيىمىنىڭ جيىنتىعى جەڭىل جاكەتتەن، يۋبكادان، تۋفليدەن، جول سومكەسى مەن قول شاتىردان قۇرالدى. فورمالار ءار سپورتشى ءۇشىن جەكە تىگىلدى»، - دەدى ايبەك بەكتۇرعانوۆ.
«ءبىز فورمانى دايىنداۋ كەزىندە بارلىق تىلەكتەردى ەسكەرىپ وتىردىق. سوعان وراي بۇرىن ءداستۇرلى سانالىپ كەلگەن پىشىمدەردەن دە باس تارتتىق. ونىڭ قالاي شىققانىن قازىر وزدەرىڭىز كورىپ وتىرسىزدار. كوزدى قۋانتادى. وسىعان وراي ساڭلاقتارىمىز ءۇمىتتى دە اقتاپ، جوعارى تابىستارعا جەتىپ جاتسا، نۇر ۇستىنە نۇر بولار ەدى»، - دەدى وليمپيادا چەمپيونى سەرىك ساپيەۆ.
كيىمدەردى دايىنداۋعا قاتىسقان كومپانيانىڭ باس ديرەكتورى ەلەنا ساۆيچيەۆا كوستيۋمدەردى ازىرلەۋ بارىسىندا برازيلياداعى اۋا رايى جاعدايىنىڭ ەرەكشەلىكتەرى دە ەسكەرىلگەنىن ايتىپ ءوتتى.
ۇلتتىق وليمپيالىق كوميتەتتىڭ باسشىسى تيمۋر قۇلىبايەۆ جيىندا كيىمدەر ۇلگىلەرىنە جوعارى باعا بەرە كەلىپ، ەلىمىزدىڭ سپورت قاۋىمداستىعىن بارلىق كۇش-جىگەر مەن ىنتا-ىقىلاستى ريو-دە-جانەيرودا وتەتىن وليمپيا ويىندارىندا جوعارى ناتيجەلەرگە جەتۋگە ۇمتىلۋعا شاقىردى. «ءبىز ءبىرىنشى كەزەكتە تازا سپورتتىق جانە ءادىل كۇرەس قاعيداتتارىن ۇستانۋعا ءتيىسپىز»، - دەدى ول.
بوكسشى قىزدار ەلوردادا جولداما ءۇشىن كۇرەسەدى
استانادا مامىردىڭ 19-27 ءسى ارالىعىندا بوكستان ايەلدەر اراسىنداعى الەم چەمپيوناتى وتكەلى تۇر. ول 51, 60 جانە 75 كيلوعا دەيىنگى سالماقتار دارەجەسى بويىنشا وليمپيادا جولداماسىنىڭ يەلەرىن انىقتايدى. بىزدەن مۇنىڭ الدىندا وتكەن وليمپيالىق ىرىكتەۋ تۋرنيرىندە 75 كيلوعا دەيىنگى سالماقتاعى داريعا شاكىموۆا ليتسەنزيا جەڭىپ الىپ قايتقان بولاتىن. دەمەك، ەلوردا رينگىندە ەندى قالعان ەكى سالماق بويىنشا كەسكىلەسكەن كۇرەس جۇرەدى. سوعان قاراماستان، قازاقستان بىرىنشىلىككە تولىق قۇرامىمەن قاتىسادى.
استانا قالاسىنداعى «بارىس-ارەنا» سارايىندا جالاۋ كوتەرەتىن سايىستا الەمنىڭ 64 ەلىنەن كەلەتىن 300 گە جۋىق بۇرىمدى بىلعارى قولعاپ شەبەرلەرى كۇش سىناسادى.
سەرىك ءپىرنازار،
«ەگەمەن قازاقستان»
