شىمكەنت تۇرعىنى 77 جاسىندا ءوزىنىڭ جەكە ەمدەۋ ورتالىعىن اشتى

ول كىسى ورتالىقتىڭ اشىلۋ سالتاناتىنا شاقىرىلعان ادامدارعا ارنايى داستارحان جايىپ، اس بەردى، جيىلعان قوناقتارمەن قۋانىشىن ءبولىستى.
جالپى، قالجان قالداروۆتىڭ ەسىمى وڭتۇستىك جۇرتشىلىعىنا جاقسى تانىس. ويتكەنى ول بىرنەشە جىلداردان بەرى ادام ەمدەۋمەن اينالىسىپ، تالاي جانعا شيپا دارىتىپ كەلەدى. «زامانانىڭ» قوسىمشاسى - «اۋىرماڭىز!» گازەتىندە ول جايلى بىرنەشە مارتە ماقالالار جارىق كورگەن بولاتىن. ەمشى تۋرالى گازەتتەن ءبىلىپ، وعان بارىپ ەم العان ادامدار از ەمەس.
قالجان قاريا بۇرىن ەمدەلۋشىلەردى شىمكەنتتىڭ بايتۇرسىنوۆ كوشەسىندەگى №67- ۇيدەگى بەس بولمەلى پاتەرىندە قابىلدايتىن. ەندى سول ءۇيدىڭ جانىنان ءۇش قاباتتى ەتىپ سالىنعان شاعىن ەمحانا اشتى. وندا ەم قابىلدايتىن بىرنەشە بولمەلەر بار، سونداي-اق 10 ادامعا جاتىپ ەمدەلۋگە جاعداي جاسالعان.
قالدار قاريانىڭ جەكە ەمدەۋ ورتالىعىنىڭ اشىلۋىنا كوپتەگەن ازاماتتار قاتىستى. ولاردىڭ ىشىندە ەمشىگە بۇرىن- سوڭدى ەمدەلىپ جۇرگەن جاندار دا بولدى. ءبىز سولاردىڭ بىرنەشەۋىن سوزگە تارتتىق.
«مەن قالەكەڭە وتكەن جىلى جازدا كورىنىپ، ەمدەلگەنمىن، - دەيدى قازىعۇرت كەنتىنەن كەلگەن 65 جاستاعى راقىمباي ورىنبايەۆ. - مەنى قان قىسىمى قاتتى مازالايتىن، ۇنەمى باسىم اۋىراتىن. اياق-قولىم ۇيىپ قالا بەرەتىن ەدى. قالەكەڭنىڭ ەمىنىڭ ارقاسىندا ءبىر ايدىڭ ىشىندە ونشاقتى كيلو سالماق تاستادىم، مازالاعان دەرتتەن ايىقتىم. ەندى ايەلىم ءاليانى ەمگە اكەلىپ ءجۇرمىن. ونىڭ دا قيمىل- قوزعالىسى قيىنداپ، اياق- قولدارى قاقسايتىن. ءۇش- ءتورت كۇننىڭ ىشىندە- اق جاعدايى جاقسارىپ قالدى. جالپى، مەنىڭ قالەكەڭە ايتار العىسىم كوپ».
داستارحان باسىندا قۇران وقىپ، ۋاعىز ايتقان شىمكەنتتىڭ ىرگەسىندەگى تاسكەن اۋىلىنداعى «قارابۋرا اۋليە» مەشىتىنىڭ يمامى سەرىك بالتابايەۆ: «بۇل كىسى - اللا بەرگەن ءبىلىمىن حالىقتىڭ يگىلىگىنە جۇمساپ جۇرگەن ادام. مۇحاممەد پايعامبارىمىزدىڭ: «مۇسىلماننىڭ سيپاتى - جۇرتقا پايدالى بولعانى. مۇسىلمان وزىنە، وزگەگە پايداسىن تيگىزەدى، وزىنە، وزگەگە زيانىن تيگىزبەيدى»، - دەگەن ءحاديسى بار. ادام ەمدەپ، جۇرتقا پايداسىن تيگىزىپ جۇرگەن بۇل كىسىنىڭ ءىسى كوپكە ۇلگى» - دەپ ءوز پىكىرىن ءبىلدىردى.
شىمكەنت قالاسىنىڭ تۇرعىنى سەيىتكارىم جولشيەۆ تە وتكەن جىلى ق. قالداروۆقا 1-اي 10 كۇن ەمدەلگەن ەكەن.
«بۇل كىسى الدىمەن اعزانى تازارتىپ، دەنەدەگى بەلسەندى نۇكتەلەردى وياتىپ ەمدەيدى، - دەيدى ول. - ۇشى جوعارى قاراتىلعان شەگە ۇستىنەن باسقىزىپ، وعان ەتپەتتەپ، شالقالاپ جاتقىزىپ، ەمدىك شوپتەر قولدانىپ، ءتۇرلى تاسىلدەرمەن شيپا دارىتادى.
مەن قانت ديابەتىمەن اۋىرامىن. بۇرىن تالاي دارىگەرلىك ەم قابىلداعانمىن. بۇل كىسىنىڭ ەمى ماعان ۇنايدى، سوندىقتان تاعى دا ءبىر ەمدەۋ كۋرسىنان وتپەك نيەتتەمىن».
قىسقاسى، ق. قالداروۆتىڭ جەكە ەمدەۋ ورتالىعىنىڭ اشىلۋىنا قاتىسقان ادامداردىڭ بارلىعى ول كىسىنىڭ ءوزى، ەمدەۋ ەرەكشەلىكتەرى جايلى از ايتقان جوق. دارىگەر- ەمشىنىڭ ءالى دە تالاي ادامعا پايداسى تيەتىنىن ايتىپ، ىسىنە ساتتىلىك تىلەپ، ىزگى لەبىزدەرىن ءبىلدىردى.
وسى ورايدا قالدار قاريانىڭ ءوزى جايلى دا ايتا كەتەيىك. ول كىسىنىڭ نەگىزگى ماماندىعى - دارىگەر، الماتى مەديتسينا ينستيتۋتىن بىتىرگەن. كەزىندە شاردارا اۋداندىق ەمحاناسىندا حيرۋرگ، لور- دارىگەر، باس دارىگەردىڭ ورىنباسارى بولىپ ەڭبەك ەتكەن تاجىريبەلى جان. ول كىسى 1997-جىلى زەينەتكەرلىككە شىققاسىن قاتتى اۋىرىپتى.
باسى ۇنەمى مازالاپ، قان قىسىمى كوتەرىلىپ مازاسىن الىپتى. مەديتسينالىق جولمەن ەمدەلگەنىنەن ناتيجە شىقپاعان. سالماعى 120 كيلو بولعان ەكەن، اۋىرعان 5 اي ىشىندە 50 كيلو سالماق تاستاپتى. ءسويتىپ جۇرگەندە قولىنا ەمدىك شوپتەر، تيبەت مەديتسيناسى، حالىق مەديتسيناسى تۋرالى ءبىر كىتاپ ءتۇسىپ، سونى وقىپ، سوندا ايتىلعانداردى قولدانىپ ءجۇرىپ ءوزىن- ءوزى ەمدەپ جازعان ەكەن. ناۋقاستاردى حالىقتىق تاسىلدەرمەن ەمدەۋدى سول جىلداردان باستاپ كەتىپتى. بۇگىندە قولىندا دەنساۋلىق ساقتاۋ مينيسترلىگىنەن ادام ەمدەۋگە بەرىلگەن رۇقسات قاعازى بار.
ءبىز ق. قالداروۆتان ەمدەۋ تاسىلدەرى جانە ونىڭ اقىسى جونىندە سۇرادىق.
««دياگنوز قويۋدى قان سىناماسىن تەكسەرۋدەن باستايمىز، - دەيدى ول كىسى. - ونىڭ اقىسى - 5 مىڭ تەڭگە. دياگنوز قويىپ العاسىن ەمدەۋگە كىرىسەمىز. سىرقاتتىڭ سيپاتىنا، اۋىر- جەڭىلىنە قاراي ەمدەۋ كۋرسى ءارقالاي، ورتاشا العاندا ءبىر ايدىڭ شاماسىنداي بولادى. اقىسى اسا قىمبات ەمەس، قولجەتىمدى».
قالجان قاريانىڭ ەمدەۋ تاسىلدەرى بويىنشا الدىمەن اعزانى قالدىقتاردان، پارازيتتەردەن تازارتىپ الۋعا ءمان بەرىلەدى ەكەن. تاعى ءبىر ءتاسىلى - ومىرتقانى ارتىق تۇزدان ارىلتۋ. سوسىن ەمدەلۋشىگە دۇرىس تاماقتانۋ ماسەلەسى ۇيرەتىلەدى. ياعني ادام ەمدەۋدە كورگەن- تۇيگەن تاجىريبەسى مول قالجان قاريانىڭ ەمدەۋ ورتالىعىندا شيپا دارىتۋ ماسەلەسى عىلىمي- مەديتسينالىق جانە حالىقتىق تاسىلدەردى ۇشتاستىرا وتىرىپ جۇرگىزىلەدى ەكەن.
ەندەشە بۇل كىسىگە ادامدارعا شاپاعاتىڭىز مولىنان تيە بەرسىن دەگەن تىلەك بىلدىرەمىز. ال «قالجان اتا» مەديتسينا ورتالىعىندا ەمدەلۋگە نيەت ەتسەڭىز، ونىڭ قىزمەتكەرلەرىمەن 371085، 87021251908 ءنومىرلى تەلەفوندار ارقىلى بايلانىسا الاسىز.
«قالجان اتا» مەديتسينالىق ورتالىعى شىمكەنت قالاسى، بايتۇرسىنوۆ كوشەسىنىڭ «ءورت ءسوندىرۋ ءبولىمى» عيماراتى تۇرعان تۇسىنان «كىشى سامال» شاعىناۋدانىنا قاراي بۇرىلعان كوشەدەگى «كەنتۋككي» ءدامحاناسىنىڭ ماڭىندا ورنالاسقان.
zamana.kz