قازاقستاننىڭ 77 ۇزدىك كەنشىسى ماراپاتتالدى - فوتو

استانا. قازاقپارات - بۇگىن استانادا گەولوگتار كۇنى كاسىبي مەرەكەسىنە وراي وتكەن جيىن بارىسىندا ينۆەستيتسيالار جانە دامۋ ءمينيسترى اسەت يسەكەشيەۆ سالانىڭ ۇزدىك ماماندارىن ماراپاتتادى.

اتاپ ايتقاندا، كەنشىلەر «قازاقستان رەسپۋبليكاسىنىڭ قۇرمەتتى كەن بارلاۋشىسى»، «قازاقستان رەسپۋبليكاسىنىڭ كەن بارلاۋ ءىسىنىڭ ۇزدىگى» جانە «قازاقستان رەسپۋبليكاسىندا كەن ورىندارىن العاش اشۋشى» اتالىمدارى بويىنشا ماراپاتتارعا يە بولدى.

«بۇگىنگى تاڭدا ءبىزدىڭ الدىمىزدا گەولوگيا سالاسىن ودان ءارى دامىتا ءتۇسۋ سەكىلدى اۋقىمدى مىندەتتەر تۇر. وسىعان بايلانىستى، مەن بۇگىن ەلىمىزدىڭ بارلىق گەولوگتارى باس قوسىپ وتىرعانىن ەسكەرە كەلە، مەملەكەتتىك ساياساتتىڭ باسىم باعىتتارىنا تاعى دا نازار اۋدارعىم كەلەدى.

بۇگىنگى كۇنى 2015-2019 -جىلدارعا ارنالعان گەولوگيالىق بارلاۋ جۇمىستارى باعدارلاماسى قولعا الىنىپ جاتقانى بارشاڭىزعا بەلگىلى. اتالعان باعدارلامانى بيۋدجەت ەسەبىنەن قارجىلاندىرۋ 120 ميلليارد تەڭگەنى قۇراسا، جەكە سەكتور مەن ۇلتتىق كومپانيالار ەسەبىنەن قوسىمشا 900 ميلليارد تەڭگە تارتىلماق. وسىنىڭ ءوزى گەولوگيالىق بارلاۋ سالاسىنىڭ ۇلتتىق ەكونوميكامىزبەن ەتەنە بايلانىستى ەكەنىن اڭعارتادى»، - دەپ اتاپ ءوتتى مينيستر قۇتتىقتاۋ بارىسىندا.

كاسىبي مەرەكەگە ارنالعان سالتاناتتى شارا بارىسىندا ۆەدومستۆو باسشىسى سالانىڭ ۇزدىك قىزمەتكەرلەرىنە ارنايى ماراپاتتاۋلاردى تابىس ەتتى. اتاپ ايتقاندا، 77 گەولوگ «قازاقستان رەسپۋبليكاسىنىڭ قۇرمەتتى كەن بارلاۋشىسى»، «قازاقستان رەسپۋبليكاسىنىڭ كەن بارلاۋ ءىسىنىڭ ۇزدىگى» جانە «قازاقستان رەسپۋبليكاسىندا كەن ورىندارىن العاش اشۋشى» اتالىمدارى بويىنشا ماراپاتتالدى. 182 كەنشىگە العىس حاتتار، گراموتالار مەن باسقا دا ناگرادالار تابىس ەتىلدى.

ەستەرىڭىزگە سالا كەتسەك، 2011 -جىلدىڭ قازانىندا قازاقستان رەسپۋبليكاسىنىڭ پرەزيدەنتى ن. نازاربايەۆتىڭ جارلىعىمەن ەلىمىزدەگى كاسىبي جانە باسقا دا مەرەكەلەر ءتىزىمىنىڭ جاڭا رەداكسياسى بەكىتىلگەن بولاتىن. سوعان وراي، قازاقستان گەولوگتارىنىڭ كاسىبي مەرەكەسى ءساۋىر ايىنىڭ العاشقى جەكسەنبىسىندە اتاپ وتىلەتىن بولىپ بەلگىلەنگەن.

 

اۆتور: قانات مامەتقازى ۇلى