مالايزيالىق «بوينگ-777» ۇشاعى اپاتىن تەرگەۋ قورىتىندىلارى جاريالاندى
ايعاق رەتىندە تەرگەۋ توبى فوتوسۋرەتتەر، بەينەجازبالار، ديالوگتاردىڭ اۋديوجازباسىن كورسەتتى جانە ۇشۋدى مودەلدەپ، ءۇش ولشەمدى كارتا ارقىلى ۇشاقتىڭ اپات بولۋىن كورسەتتى.
سونىمەن بىرگە، تەرگەۋشىلەر «بۋك» كولونناسىنىڭ ءجۇرۋ باعىتىن ەگجەي- تەگجەيلى سيپاتتاپ بەردى. ولاردىڭ حابارلاۋىنشا، ۇشاقتىڭ اپاتىنا سەبەپكەر بولعان «بۋك» ۇشىرۋ قوندىرعىسى رەسەيدەن ۋكرايناعا جەتكىزىلگەن.
رەسەي قورعانىس مينيسترلىگى ۇشاق اپاتىنا قانداي دا ءبىر قاتىسى بارىن جوققا شىعارۋدا جانە ءوز نۇسقالارىن ايتۋدا. باسپا ءسوز كونفەرەنسياسى باستالماي تۇرىپ، كرەمل باسپا ءسوز حاتشىسى دميتري پەسكوۆ جۋرناليستەرگە ءوزىن- ءوزى جاريالاعان دونەتسك حالىق رەسپۋبليكاسى وكىلدەرىنىڭ ۇشاقتى اتىپ ءتۇسىرۋى مۇمكىن ەمەس ەكەنىن مالىمدەدى.
«رەسەيلىك تاراپ بۇل قايعىلى وقيعانىڭ ءادىل جانە تولىق تەرگەلۋىن قولدايدى جانە قولداپ كەلەدى. اپات تۋرالى الۋان ءتۇرلى كوزقاراستار بار، ولاردىڭ ءبىرى ساراپشىلىق، ءتىپتى بۇلتارتپاس ايعاقتار دا بار. ءسوزسىز، ءبىزدىڭ اسكەريلەر جاريالاعان سوڭعى اقپاراتتى - اتالعان اۋماقتا ۇشۋى مۇمكىن بارلىق ۇشۋ اپپاراتتارى مەن نىسانداردى ءتۇسىرىپ العان باستاپقى رادار دەرەكتەرىن دە ەسكەرە وتىرىپ قورىتىندى جاساعان ءجون»، - دەگەن دميتري پەسكوۆتىڭ ءسوزىن كەلتىرەدى ريا نوۆوستي.
2014 -جىلدىڭ شىلدە ايىندا امستەردامنان كۋالا- لۋمپۋرگە بەت العان «مالايزيا اۋە جولدارىنىڭ» "بوينگ-777" ۇشاعى ۋكراينانىڭ وڭتۇستىك- شىعىسىندا وپات بولدى. بورتتا بولعان بارلىق 298 ادام مەرت بولعان ەدى.
