بوەينگ-777-نى اتىپ تۇسىرگەن كىم؟
دەرەك كوزدەرىنىڭ مالىمەتىنە قاراعاندا ۇشاق بورتىندا 283 جولاۋشى مەن 15 ەكيپاج مۇشەسى بولعان.
الدىن الا بولجام بويىنشا، ۇشاق "بۋك" زەنيت-زىمىران كەشەنىنەن اتىلعان.
Boeing 777 ۇشاعىنىڭ اپاتقا ۇشىراۋىنا قاتىستى ۋكراينا مەن رەسەي تاراپتارى، سونداي-اق وزدەرىن رەسپۋبليكا دەپ جاريالاعان "دونەتسكى جانە لۋگانسكى حالىقتىق رەسپۋبليكاسى" وكىلدەرى ءارتۇرلى باعا بەرۋدە.
رەسەي تاراپىنىڭ باعاسى
رەسەي پرەزيدەنتى ۆلاديمير پۋتين:
- Malaysia Airlines اۋە كومپانياسىنىڭ «بوينگ-777» ۇشاعىنىڭ اپاتىنا ۋكراينا ايىپتى. «ءسوز جوق، قايعىلى وقيعا قاي ەلدىڭ تەرريتورياسىندا بولسا، سول ەل جاۋاپتى»، دەدى رەسەي كوشباسشى.
رەسەي پرەزيدەنتىنىڭ ايتۋىنشا، ول بارلىق اسكەري ۆەدومستۆولارعا وسى اپاتتى تەكسەرىپ، زەرتتەۋگە كومەك بەرۋدى تاپسىرعان. «رەسەي فەدەراتسياسى ۇكىمەتىنەن بارلىق ازاماتتىق ۆەدوسمتۆولاردى جۇمىلدىرا وتىرىپ وسى وقيعانىڭ انىق- قانىعىن تەكسەرۋدى سۇرايمىن. ءبىز قولىمىزدان كەلگەننىڭ ءبارىن ىستەيمىز. وسى وقيعا ءبىزدىڭ، ۋكراينانىڭ، بۇكىل الەمنىڭ جۇمىلا ارەكەت ەتە الاتىنىن دالەلدەۋى ءتيىس. ءبارىمىز وسى اپاتقا قاتىستى وبەكتيۆتى اقپارات الۋىمىز كەرەك» ، دەيدى پۋتين.
روس اۆياتسيا:
- مالايزيالىق «بوينگتى» اتقان ۋكراينالىق زىمىراننىڭ نەگىزگى كوزدەگەنى رەسەي پرەزيدەنتى پۋتيننىڭ ۇشاعى بولۋى مۇمكىن.
ريا نوۆوستي اگەنتتىگىنىڭ دەرەك كوزى:
- ۋكراينا اسكەرى سارسەنبى كۇنى مالايزيالىق Boeing اپاتقا ۇشىراردان ءبىراز بۇرىن «بۋك» قوندىرعىسىن دونەتسكى اۋماعىنا اكەلگەن.
RT تەلەارناسى:
- «بوريسپول» اۋەجايىنىڭ قىزمەتكەرى، تەگى يسپاندىق اۆيوديسپەتچەر - كارلوس ءوزىنىڭ Twitter پاراقشاسىندا، مالايزيالىق اۆيولاينەر اپاتقا ۇشىراۋدان ءسال بۇرىن رادار « Boeing 777» ماڭىندا ۋكراين اسكەري ۇشاعى پايدا بولعانىن جازعان. « Boeing 777» راداردان جوعالىپ كەتەردەن ءۇش مينۋت بۇرىن اسكەري ۇشاقتار ءدال سونىڭ ماڭىنان ۇشىپ وتكەن ەدى» دەپ جازادى كارلوس.
سونداي- اق تەلەارنا « Boeing » راداردان جوعالىپ كەتكەن سول ساتتە كييەۆ بيلىگى بىزگە Boeing 777 ۇشاعىنىڭ اپاتقا ۇشىراعانىن حابارلادى. ولار سول ساتتە ونى قالاي ءبىلدى؟» دەگەن كارلوستىن سوزدەرىن كەلتىرەدى.
ۋكراينا تاراپى
ۋكراينا پرەزيدەنتى پەتر پوروشەنكو:
- بۇل توتەنشە وقيعا نە اپات ەمەس، بۇل تەررورلىق اكت. بۇل سوڭعى ۋاقىتتا ورىن العان ءۇشىنشى تروگەديالىق جاعداي. بۇعان دەيىن رەسەيلىك تەرروريستەر ۋكراينا قارۋلى كۇشتەرىنىڭ ا ن-26 جانە س ۋ-25 ۇشاقتارىن اتىپ تۇسىرگەن. مەن ورىن العان جاعدايعا بايلانىستى مەملەكەتتىك كوميسسيا قۇرۋدى جانە ونىڭ قۇرامىنا نيدەرلاندا مەن IKAO كوميسسياسى ماماندارىن قوسۋدى تاپسىردىم. بۇگىندە تەرروريستەر ءبىر-اق رەت اتىپ 300 ادامدى جەر جاستاندىردى. قازا تاپقانداردىڭ اراسىندا ايەلدەر، بالالار، الەمنىڭ ءار ەلىنەن ازاماتتار بار. بۇگىندە بۇكىل الەم ناعىز اگرەسسوردىڭ شىنايى بەينەسىن كوردى. ويتكەنى قاراپايىم جولاۋشىلاردى اپاتقا ۇشىراتۋ حالىقارالىق تەرروريستىك اكت بولىپ سانالادى. بۇل - دۇنيەجۇزىنە قارسى باعىتتالعان ارەكەت.
ۋكراينا ىشكى ىستەر ءمينيسترىنىڭ كەڭەسشىسى انتون گەراشەنكو:
- پۋتين قۇرمەتپەن بەرگەن "بۋك" زەنيت-زىمىران كەشەنىنىڭ كومەگىمەن تەرروريستەر امستەردام - كۋالا-لۋمپۋر باعىتىنداعى ازاماتتىق ۇشاقتى اتىپ ءتۇسىردى.
«ۋكراينسكايا پراۆدا» :
- ۋكراينا اۋماعى ارقىلى حالىقارالىق ءدالىز شەڭبەرىندە 10 مىڭ مەتر بيىكتىكتە ۇشقان اۋە كولىگىمەن اراداعى بايلانىس 17 - شىلدە كۇنى جەرگىلىكتى ۋاقىت 16:20 دا ۇزىلگەن. ول سودىرلاردىڭ باقىلاۋىنداعى گرابوۆو تۇراعى اۋدانىنا قۇلادى.
ۋكراينا پرەزيدەنتى اكىمشىلىگى:
- ۇشاقتىڭ اتىپ تۇسىرىلگەنىن جوققا شىعارمايمىز، ءبىز ۋكراينا قارۋلى كۇشتەرىنىڭ اۋاداعى نىساندارعا قاتىستى ەشقانداي ارەكەت جاساماعانىن باسا ايتقىمىز كەلەدى.
ۋكراينا ىشكى ىستەر ءمينيسترىنىڭ كەڭەسشىسى انتون گەراشەنكو:
- بۇگىن تاڭەرتەڭ جەرگىلىكتى پاتريوتتار اتالمىش كومپلەكستىڭ تورەزدەن سنەجنوەعا قاراي باعىت العانىن كورگەن.
ۋكراينا قاۋىپسىزدىك قىزمەتى:
- مالايزيالىق جولاۋشىلار ۇشاعىن دونباس ۇستىندە چەرنۋحينسكى بلوكپوستىندا تۇرعان "كازاكتار" اتىپ تۇسىرگەن. سەپاراتيستەردىڭ سول تۋرالى تەلەفونمەن سويلەسكەنى جازىپ الىندى. تەلەفون اڭگىمەسى بارىسىندا تەرروريست يگور بەزلەر (بەس) ءوزىنىڭ كۋراتورى ر ف ق ك ب ب ب پولكوۆنيگى گەرانين ۆاسيلي نيكولايەۆيچكە ۇشاقتى اتىپ تۇسىرگەنى تۋرالى بايانداعان.
ونىڭ جولاۋشىلار ۇشاعى ەكەنىن كەش تۇسىنگەن. بۇعان تەرروريستەر "مايور" مەن "گرەكتىڭ" تەلەفون ارقىلى سويلەسكەن اڭگىمەسى دالەل.
ۋ ق ق تاعى ءبىر جاساقشىنىڭ دوندىق اتامان-نيكولاي كوزيتسىنمەن سويلەسكەن ءسوزىن كەلتىرەدى. جاساقشىنىڭ «مالايزيالىق ۇشاق ۋكراينا تەرريتورياسىندا نە ىستەپ ءجۇر؟» دەگەن ساۋالىنا، كوزيتسىن «شپيوندار اكەلگەن شىعار، بىلمەيمىن. سوعىس بولىپ جاتقان جەردە نەسى بار» دەپ جاۋاپ بەرگەن.
«دونەتسكى جانە لۋگانسكى حالىقتىق رەسپۋبليكاسى» وكىلدەرىنىڭ باعاسى
"دونەتسكى جانە لۋگانسكى حالىقتىق رەسپۋبليكاسى" پرەمەرى الەكساندر بوروداي:
- جاساقشىلاردا 10 كيلومەتر بيىكتىكتەگى ۇشاقتى اتىپ تۇسىرەتىن قارۋ جوق. ولاردىڭ قولىنداعى قوندىرعىلارمەن 2-3 كيلومەتر بيىكتىكتەگى نىسانانى اتىپ ءتۇسىرۋ مۇمكىن. سوندىقتان بۇل نە ۋكراينا اۋە كۇشتەرىنىڭ ءىسى نە اۋە شابۋىلىنا قارسى قورعانىس. كيەۆ رەسەي تاراپىنان بولۋى ىقتيمال سوققىنى قايتارۋ ءۇشىن 14 - شىلدەدە ءوزىنىڭ اۋە شابۋىلىنا قارسى قورعانىسىن تولىق اسكەري جاعدايعا دايىنداعان. "شاماسى مىناۋ سول دايىندىقتىڭ سالدارى بولسا كەرەك.
«دونەتسكى جانە لۋگانسكى حالىقتىق رەسپۋبليكاسى» ۆيتسە-پرەمەرى اندرەي پۋرگين:
- مالايزيالىق ۇشاقتى رەسەيلىك ۇشاق دەپ ۋكراينا اسكەرلەرى اتىپ تۇسىرگەن. ويتكەنى، ۋكراينالىق اسكەريلەر رەسەيلىك بارلاۋشى ۇشاقتاردىڭ ۋكراينا اۋە كەڭىستىگىندە ۇشىپ جۇرگەنى تۋرالى ۇنەمى اقپارات تاراتىپ وتىرادى. ۋكراينا اسكەرلەرى ۇشۋعا رۇقسات ەتىلمەگەن زونادا، جوعارى بيىكتىكتە ۇشۋشى وبەكتتى انىقتاعان. ونى رەسەيدىڭ بارلاۋشى نە ۇشقىشسىز ۇشاعى دەپ ويلاپ اتىپ تۇسىرگەن. ويتكەنى ۋكراين اسكەرلەرى رەسەيلىك بارلاۋشى ۇشاقتى اتىپ ءتۇسىرۋدى ماقسات ەتىپ جۇرگەن. ال مالايزيالىق ۇشاق ەكيپاجى ۋكراينانىڭ ۇشۋعا رۇقسات ەتىلمەگەن زوناسى جايلى بىلمەگەن.
"لۋگانسكى حالىقتىق رەسپۋبليكاسى" قورعانىس ءمينيسترى يگور پلوتنيتسكي:
- مالايزيالىق Boeing 777 ۇشاعىنىڭ اپاتقا ۇرىنۋى ۋكراين اسكەرلەرىنىڭ ءىسى. مۇنى باسقا ەشكىم دە ىستەي المايدى. ەندى ۋكراينا تاراپى ءوزىن قالاي ۇستايتىنى بەلگىلى. ولار بۇل جاعدايدى وزگەلەرگە ارتا سالادى.
"لۋگانسكى رەسپۋبليكاسىنىڭ" باسپا ءسوز قىزمەتى:
- مالايزيالىق Boeing-777 ۋكراينا ا ا ك-نىڭ شتۋرموۆيگىمەن اتىپ تۇسىرىلگەن. كۋاگەرلەر بوينگ 777 ۇشاعىنا ۋكراينا ا ا ك-نىڭ شتۋرموۆيگىنىڭ شابۋىل جاساعانىن كورگەن. ودان كەيىن جولاۋشىلار ۇشاعى ەكىگە ءبولىنىپ كەتىپ، "دونەتسكى حالىقتىق رەسپۋبليكاسى" اۋماعىنا قۇلاعان.
مالايزيا تاراپى
مالايزيالىق اۋە كومپانياسىنىڭ باسپا ءسوز قىزمەتى:
- ۋكراينالىق ديسپەتچەرلەر ماسكەۋ ۋاقىتى 18.45 تە رەسەيمەن اراداعى شەكارادان 50 شاقىرىم جەردە ۇشاقپەن بايلانىستى جوعالتقان.
مالايزيا سىرتقى ىستەر ءمينيسترى حيشامۋددين حۋسەين:
- ۆەدومستۆونىڭ قولىندا ناقتى دەرەكتەر جوق. اۆيوكومپانيا وكىلدەرىمەن حابارلاسىپ، پرەمەر-مينيستر نادجيب رازاكپەن بايلانىستا وتىرمىن.
مالايزيا پرەمەر- ءمينيسترى نادجيب رازاك:
- مالايزيالىق ۇشاقتىڭ ۋكراينادا اپاتقا ۇشىراۋىنا قاتىستى تەكسەرۋ جۇرگىزىلەدى.
ساراپشىلار
ءبازبىر ساراپشىلار مالايزيالىق اپاتتىڭ ۇشىراۋىنا ا ق ش-تىڭ قاتىسى بولۋى مۇمكىن دەگەن بولجام ايتادى. ولاردىڭ پايىمداۋىنشا رەسەي مەن ۋكراينا اراسىنداعى جاعدايدى ۋشىقتىرۋ ماقساتىندا ا ق ش وسىنداي ارەكەت جاساۋى دا ىقتيمال.
دەرەككوز: «الاش ايناسى»
