ءۇندىستاندا جاڭبىردان 770 ادام قازا تاپتى

استانا. قازاقپارات - ءۇندىستاندا جاڭبىرلى ماۋسىم باستالعالى 770 ادام وپات بولدى. تاعى 30 دان استام ادام ۇشتى-كۇيلى جوعالىپ كەتكەن، دەپ حابارلايدى قازاقپارات 24.kz سىلتەمە جاساپ.

35 مىڭنان اسا تۇرعىن قاۋىپسىز جەرگە كوشىرىلدى. ەلدىڭ ىشكى ىستەر مينيسترلىگى وسىلاي دەپ مالىمدەدى. دەرەكتەرگە قاراعاندا، تابيعات اپاتىنان كەرالا، ۋتتار-پرادەش، باتىس بەنگاليا جانە ماحاراشترا شتاتى كوپ زارداپ شەككەن. بۇل وڭىرلەردە نوسەر مەن سۋ تاسقىنىنان جۇزدەن استام تۇرعىن كوز جۇمدى.

ەگىستىك القاپتارى ءبۇلىنىپ، ەل ەكونوميكاسى شاش-ەتەكتەن شىعىن كوردى. قازىر اپات ايماقتارىندا ىزدەستىرۋ- قۇتقارۋ جۇمىستارى ءجۇرىپ جاتىر. وعان توتەنشە جاعداي قىزمەتى مەن بىرگە جاياۋ جانە تەڭىز اسكەري كۇشتەرى دە جۇمىلدىرىلعان.

ايتا كەتەيىك، ءۇندىستاندا جازدىڭ العاشقى ايىنان جاڭبىرلى ماۋسىم باستالىپ، قىركۇيەككە دەيىن سوزىلادى. وسى كەزەڭدە جۇزدەگەن ادام تابيعات اپاتىنان مەرت بولىپ، ەل ەكونوميكاسىنا وراسان شىعىن كەلەدى.