الماتىلىق 76 جاستاعى تۇرعىن كورشىسىن ورتتەن قۇتقارعانى ءۇشىن ماراپاتتالدى
الەكساندر دەۆيۆە ادام ءومىرىن قۇتقارۋدا قاھارماندىق تانىتقانى ءۇشىن ق ر ءى ءى م الماتى قالاسى توتەنشە جاعدايلار دەپارتامەنتىنىڭ باسشىسى، ورتكە قارسى قىزمەت گەنەرال- مايورى سەرىك اۋباكىروۆتىڭ العىس حاتىمەن ماراپاتتالدى.
ماراپاتتى الماتى ق. ت ج د، بوستاندىق اۋدانى بويىنشا توتەنشە جاعدايدار ءبولىمىنىڭ باسشىسى مىندەتىن اتقارۋشى باۋىرجان بەيسەنقانوۆ الەكساندر يوسيفوۆيچكە سالتاناتتى تۇردە تابىستادى.
«الەكساندر دەۆيۆە ءوزىنىڭ ەگدە جاسىنا قاراماستان، ءورت كەزىندە ادامداردى قۇتقارىپ، جوعارعى ادامي قاسيەت تانىتتى. بۇل - ناعىز ەرلىك»، - دەدى ول.
2016 -جىلى 17 -ماۋسىمدا، 14:57 دە الماتى قالاسى، بوستاندىق اۋدانى، ءال-فارابي داڭعىلىنداعى پاتەردە ءورت شىققان بولاتىن. №75 پاتەردىڭ يەسى ورتتەن قاشۋ ماقساتىندا بەسىنشى قاباتتىڭ تەرەزە ەرنەۋىنە شىققان. سول مەزەتتە الەكساندر يوسيفوۆيچ كورشىسىن بايقاپ قالىپ، بيىكتەن قۇلاۋىنا جول بەرمەي، ءوز پاتەرىنە كىرگىزگەن.