سوڭعى ءۇش جىلدىڭ ىشىندە 76 پوليتسەي قىزمەتتىك بورىشىن اتقارۋ ۇستىندە مەرت بولدى
ق ر ءى ءى م القا وتىرىسىندا ق ر پرەزيدەنتىنىڭ كومەكشىسى - قاۋىپسىزدىك كەڭەسىنىڭ حاتشىسى قايرات قوجامجاروۆ وسىنداي دەرەكتەردى كەلتىردى.
«پوليتسەيلەر قوعام مەن مەملەكەتتىڭ قۇقىقتارى مەن مۇددەلەرىن قورعاۋدى قامتاماسىز ەتە وتىرىپ، قىلمىسپەن كۇرەستىڭ العى شەبىندە تۇر، كەيدە ولار ءوز ومىرلەرىن دە قۇربان ەتۋدە. سوڭعى ءۇش جىلدىڭ ىشىندە عانا قىزمەتتىك بورىشتارىن اتقارۋ كەزىندە 76 قىزمەتكەر مەرت بولدى جانە 352 سى جاراقاتتاندى»، - دەدى ق. قوجامجاروۆ.
ول مەملەكەت باسشىسىنىڭ ىشكى ىستەر ورگاندارىنىڭ الدىنا قويعان باستى مىندەتتەر مەن تاپسىرمالاردى اتاپ ءوتتى. ەڭ باستىسى، جاڭا قۇقىقتىق جاعدايدا، ياعني جاڭادان قابىلدانعان قىلمىستىق، قىلمىستىق-ءىس جۇرگىزۋ، قىلمىستىق-اتقارۋ مەن اكىمشىلىك قۇقىق بۇزۋشىلىق كودەكستەرىنىڭ نەگىزىندە ساپالى تۇردە جۇمىسقا دايىندىق، سونىمەن قاتار قوعامداعى كەز-كەلگەن قۇقىققا قايشى كەلەتىن ارەكەتتەرگە قارسى قوعامدا نولدىك توزبەۋشىلىك قاعيداتىن ىسكە اسىرۋ، قوعامدىق ءتارتىپ پەن قۇقىق بۇزۋشىلىق پروفيلاكتيكاسىنىڭ ءتيىمدى جۇيەسىن قۇرۋ.
قالمۇقانبەت قوجامجاروۆ قازىرگى زامانعى گەوساياسي جاعدايدىڭ تۇبەگەيلى وزگەرۋىنە بايلانىستى تۋىندايتىن قاۋىپكە قارسى قۇقىقتىق قۇرىلىمدىق كۇشتەرىنىڭ توتەپ بەرۋى بويىنشا دايىندىعىنا، اسىرەسە تەرروريزم مەن ەكسترەميزمنىڭ كۇشەيۋى، شيەلەنىستەردىڭ شەشىلۋىندەگى جاڭا تەحنولوگيالاردىڭ پايدا بولۋى، ۇيىمداسقان قىلمىستىڭ بەلسەندىلىگى مەن ەسىرتكىگە قاتىستى جاعدايدىڭ ۋشىعۋىنا ەرەكشە توقتالىپ ءوتتى.
مينيستر قالمۇقانبەت قاسىموۆ مەملەكەت باسشىسىنىڭ تاپسىرمالارىن ورىنداۋ ماقساتىندا قۇقىقتىق ءتارتىپتى، قىلمىس جانە قۇقىق بۇزۋشىلىقپەن كۇرەستى قامتاماسىز ەتۋدە ىشكى ىستەر ورگاندارى قىزمەتىنىڭ دەڭگەيىن ءتيىمدى جوعارىلاتۋ ءارى ساپالى كوتەرۋ ءۇشىن ىشكى ىستەر ورگاندارى تاراپىنان قابىلدانىپ جاتقان شارالار تۋرالى ايتىپ بەردى.
سونىمەن قاتار ەلدە قىلمىستىڭ الدىن الۋ جۇيەسىن قالىپتاستىرۋ، قىلمىس جاساعانى ءۇشىن جاۋاپكەرشىلىككە مىندەتتى تۇردە تارتىلاتىندىعى جانە پوليتسيا قىزمەتكەرلەرىنىڭ وزدەرى زاڭدىلىقتى قاتاڭ تۇردە ساقتاۋ كەرەكتىگىنە توقتالدى.
ءسوز سوڭىندا قابىلدانعان شارالاردىڭ ناتيجەسىندە مينيسترلىكتىڭ جەدەل-قىزمەتتىك جۇمىسىنداعى كوپتەگەن سالالار بويىنشا وڭ ناتيجەلەرگە جەتكەندىگىن اتاپ ءوتتى.
