قازاقستاندا گاز قۇبىرلارىنىڭ 75 پايىزى توزعان

نۇر-سۇلتان. قازاقپارات - ەلىمىزدەگى گاز قۇبىرلارىنىڭ 75 پايىزى توزعان.
None
None

بۇل تۋرالى بۇگىن سەناتتاعى ۇكىمەت ساعاتىندا ەنەرگەتيكا ءمينيسترى بولات اقشولاقوۆ ايتتى، دەپ حابارلايدى قازاقپارات ءتىلشىسى.

«ەنەرگەتيكا مينيسترلىگى مەن QazaqGaz ۇلتتىق كومپانياسىنىڭ تاعى ءبىر مىندەتى - ماگيسترالدىق گاز قۇبىرلارىن جاڭعىرتۋ. نەگىزگى گاز تاسىمالداۋ ينفراقۇرىلىمى جالپى كەڭەس زامانىندا سالىنعان جانە قاۋىپسىز پايدالانۋدى قامتاماسىز ەتۋ ءۇشىن ۇلكەن ينۆەستيتسيانى قاجەت ەتەدى. قازىرگى ۋاقىتتا ءبىرقاتار گاز قۇبىرى تولىق قۋاتتا جۇمىس ىستەيدى جانە وتاندىق گازدى ەل تۇتىنۋشىلارىنا تۇراقتى جەتكىزۋدى قولداۋ ءۇشىن جاڭا قۋاتتار سالۋ قاجەت. مىسالى، ماگيسترالدىق گاز قۇبىرلارىنىڭ 21 پايىزى 50 جىلدان استام، 50 پايىزعا جۋىعى 40 جىلدان استام ۋاقىت بويى پايدالانىلۋدا. جالپى، توزۋدىڭ ورتاشا دەڭگەيى 75 پايىزدان اسادى»، - دەدى ول.

ءمينيستردىڭ ايتۋىنا قاراعاندا، ەلىمىزدىڭ گاز تاسىمالداۋ جۇيەسىن جاڭعىرتۋعا جانە كەڭەيتۋگە ەلەۋلى قاراجات سالۋ كەرەك.

«بۇگىنگى تاڭدا گاز قۇبىرلارىنىڭ اعىمداعى جاي-كۇيىن راستاۋ ءۇشىن QazaqGaz ۇلتتىق كومپانياسى «yLF Consulting» حالىقارالىق اۋديتورلىق كومپانياسىن تارتىپ، تەحنيكالىق اۋديت جۇرگىزۋدە. ونىڭ ناتيجەسىندە گاز تاسىمالداۋ جۇيەسىن جاڭعىرتۋعا قاجەتتى قاراجات مولشەرى انىقتالادى»، - دەدى بولات اقشولاقوۆ.

سوڭعى جاڭالىقتار