تۇركىستاندا جوعالعان جىگىتتىڭ 75 ميلليون تەڭگە قارىزى بولعان
ول تانىستارىنان العان اقشانى قۇمار ويىنعا جۇمساپ وتىرىپتى، دەپ حابارلايدى قازاقپارات ءتىلشىسى. لەنگەر قالاسىنىڭ تۇرعىنى جاسى 30-عا جۋىقتاعان ۇلىنىڭ 4 تاۋلىكتەن بەرى ءىز- ءتۇزسىز كەتكەنىن ايتىپ، پوليتسەيلەرگە حابارلاسقان. تولەبي ا پ ب قىزمەتكەرلەرى قالا كوشەلەرىن تەكسەرىپ، فوتوسۋرەتىن كورسەتۋ ارقىلى تۇرعىندار اراسىندا سۇراستىرۋ جۇمىستارىن جۇرگىزدى. رەسپۋبليكا كولەمىندە ءتارتىپ ساقشىلارىنا باعىتتامالار جولدانىپ، جوعالعان جىگىتتىڭ ايرىقشا بەلگىلەرىن حابارلاعان. جاقىندارى مەن تۋىستارى، تانىستارى مەن بارۋى مۇمكىن جەرلەر مۇقيات تەكسەرىلگەن.
ىزدەۋ جۇمىستارىنا جەرگىلىكتى پوليتسيا قىزمەتىنىڭ ۋچاسكەلىك پوليتسيا، جەدەل ۋاكىلدەر مەن پاترۋلدىك پوليتسەيلەر جۇمىلدىرىلدى. ناتيجەسىندە ءتارتىپ ساقشىلارى جوعالعان جىگىتتى الماتى قالاسىندا جۇرگەن جەرىنەن تاپتى.
«بەلگىلى بولعانداي، ازامات ءوزىنىڭ تانىستارىنان 75 ميلليون تەڭگە قارىزعا اقشا الىپ، ونى قۇمار ويىنعا جۇمساپ جىبەرگەن. ول ءوز سوزىندە قارىزعا العان اقشاسىن قايتارا الماعاندىقتان، الماتى قالاسىنا قاشىپ كەتۋگە ءماجبۇر بولعانىن جەتكىزدى» - دەلىنگەن تۇركىستان وبلىسى پوليتسيا دەپارتامەنتى تاراتقان حابارلامادا.
قازىرگى تاڭدا جوعالىپ كەتكەن ورتا جاستاعى ازامات امان ەسەن وتباسىنا ورالدى. ۇلىمەن قاۋىشقان اناسى، بالاسىن ىزدەستىرۋدە كاسىبيلىكتەرىن كورسەتىپ، تاۋىپ بەرگەن پوليتسيا قىزمەتكەرلەرىنە ريزاشىلىعىن ءبىلدىردى.
