قازاقستان ادام بوستاندىعى يندەكسىندە 75-ورىنعا تۇراقتادى

ق ر يندەكسى - 6,99 بولدى، بۇل كورسەتكىش ە ا ە و- عا كىرەتىن ارمەنيا مەن قىرعىزستانعا قاراعاندا تومەن، ءبىراق بەلارۋس پەن رەسەيگە قاراعاندا جوعارى. ال جەكە باس بوستاندىعى بويىنشا رەيتينگىدە 90-ورىندا، ەكونوميكا بويىنشا - 73-ورىندا، - دەپ حابارلايدى قازاقپارات.

ادام بوستاندىعى يندەكسى ەكى نەگىزگى كومپونەنتتى قامتيدى - جەكە جانە ەكونوميكالىق ەركىندىك. قازاقستاندا جەكە باس بوستاندىعى يندەكسى - 6,85، ەكونوميكالىق - 7,12. رەيتينگىدەگى ماكسيمال يندەكس - 10، بۇل ەلدەگى ادامدار تولىق ەركىن دەگەن ءسوز، ال مينيمال - 0 - تيىسىنشە، بوستاندىعى جوق ەلدەر.

جاڭا زەلانديا، شۆەيتساريا جانە گونكونگ بوستاندىق يندەكسى جوعارى ەلدەر رەيتينگىنى باستاپ تۇر. ال اياقتاعان - 3,97 كورسەتكىشىمەن سيريا.

بوستاندىق يندەكسى بيلىك ورگاندارى ادامداردى قانشالىق شەكتەيتىنىن نەمەسە ماجبۇرلەيتىنىن كورسەتەدى. ەلدەردەگى بۇل يندەكس ادام قىزمەتىنىڭ ون ەكى سالاسىن كورسەتەتىن جەكە، ازاماتتىق، ەكونوميكالىق بوستاندىقتىڭ 76 كورسەتكىشى نەگىزىندە ەسەپتەلەدى:

زاڭنىڭ ۇستەمدىگى،

قاۋىپسىزدىك،

قوزعالىس ەركىندىگى،

ءدىن بوستاندىعى،

قاۋىمداستىقتار مەن ازاماتتىق قوعام بوستاندىعى،

ءسوز جانە اقپارات بوستاندىعى،

جەكە باسىن جانە جەكە قارىم-قاتىناسىن تاڭداۋ ەركىندىگى،

ۇكىمەت ولشەمدەرى،

قۇقىقتىق جۇيەنىڭ ساپاسى جانە مەنشىك قۇقىعىن قورعاۋ،

سەنىمدى اقشاعا قول جەتكىزۋ،

حالىقارالىق ساۋدا بوستاندىعى،

بيزنەستى، ەڭبەكتى، نەسيەلەۋدى رەتتەۋ.

العاشقى جەتى سالا جەكە باس بوستاندىعى يندەكسىندە ەسەپكە الىنادى، وسى يندەكس بويىنشا قازاقستان رەيتينگىدە 90-ورىندا. سوڭعى بەس سالا ەكونوميكالىق ەركىندىك يندەكسىندە ەسكەرىلەدى، مۇندا قازاقستان 73-ورىندى يەلەندى.

جەكە باس بوستاندىعى يندەكسى بويىنشا قازاقستاننىڭ قاۋىپسىزدىك بولىمىندە جانە بىرەگەيلىك پەن جەكە قارىم-قاتىناستاردى تاڭداۋ ەركىندىگىندە باعا جامان ەمەس - 10-نان 9، ءجۇرىپ-تۇرۋ ەركىندىگى بويىنشا دا - 10 نان 8,3.

ەكونوميكالىق ەركىندىك يندەكسى بويىنشا باعا تومەنىرەك. وسىلايشا، اقشاعا قول جەتكىزۋ ەركىندىگى بويىنشا يندەكس - 8,8. ودان كەيىن بيزنەستى، ەڭبەكتى، نەسيەلەردى جانە ۇكىمەت كولەمىن رەتتەۋ ەركىندىگى تۇر.