ۇلى وتان سوعىسى كەزىندە قازا تاپقان قازاق جاۋىنگەرى 75 جىلدان كەيىن جەرلەنبەك
مايدانعا قازىرگى قۇرمانعازى اۋدانىنان 21 جاسىندا اتتانعان قۇسپانعالي بورانبايەۆتىڭ سۇيەگىن بىرلەسىپ جۇمىس جاساعان قازاقستاندىق جانە رەسەيلىك ىزدەستىرۋ توپتارى نوۆگورود قالاسىنىڭ ماڭىنان تاۋىپتى، دەپ حابارلادى ك ت ك.
سۇيەگىنىڭ بەلگىلى ءبىر بولىگى عانا امان ساقتالعان قازاق ساربازىنىڭ جانىنان ءوزىنىڭ اتى- ءجونى ويىلىپ جازىلعان قاسىق پەن كاپسۋلا شىققان. مۇراعات قۇجاتتارىندا قۇسپانعالي بورانبايەۆتىڭ1922 -جىلى دۇنيەگە كەلىپ، اسكەرگە 1941 -جىلى الىنعاندىعى جانە ونىڭ 28-اتقىشتار ديۆيزياسىنىڭ قۇرامىندا شايقاسقاندىعى ايتىلعان. 1943 -جىلى نوۆگورود وبلىسىنىڭ پارفينسكيي اۋدانى ماڭىندا ەرلىكپەن قازا تاپقان ساربازعا بۇگىن جەرلەستەرى قۇرمەت كورسەتتى. قالاداعى جەڭىس ساياباعىندا سالتاناتتى شارا ۇيىمداستىرىلىپ، ساربازدىڭ سۇيەگى تۋىستارىنا تابىستالدى.
«مەنىڭ اكەمنىڭ اكەسىنىڭ تۋعان ءىنىسى. ەندى ءبىزدىڭ مىندەتىمىز ءارى قاراي تۋعان جەرىنە، ءوزىنىڭ باۋىرلارىنىڭ قاسىنا وسى سۇيەكتى اپارۋ، سول جاقتا قازاقشا سالتپەن بارلىق داستۇرلەرىن ۇيىمداستىرۋ»، - دەيدى قۇسپانعالي بورانبايەۆتىڭ تۋىسى زىليحا دۇيسەكەنوۆا.