پاۆلوداردا سابيلەر ۇيىندەگى بالالاردىڭ 75 پايىزى - الەۋمەتتىك جەتىمدەر
بۇل تۋرالى اگەنتتىكتىڭ جولداعان رەسمي ساۋالىنا بەرگەن جاۋابىنا وبلىستىق دەنساۋلىق ساقتاۋ باسقارماسىنىڭ باسشىسى نۇرلان قاسىموۆ ءمالىم ەتتى، دەپ حابارلايدى pavlodarnews.kz.
- بۇگىنگى تاڭدا سابيلەر ۇيىندە 72 بالا بار. مۇندا جارىق دۇنيە ەسىگىن اشقان بالعىندار ءتورت جاسقا دەيىن، ال مۇمكىندىگى شەكتەۋلى بالالار بەس جاسقا دەيىن تۇرادى. ولاردىڭ باسىم بولىگى، 75 پايىزى - الەۋمەتتىك جەتىمدەر. ياعني، مۇنداي بالالاردىڭ بيولوگيالىق اتا-انالارى بار بولعانمەن، ولاردىڭ اتا-انا قۇقىقتارىنا شەكتەۋ قويىلادى. دەگەنمەن كوپ جاعدايدا جالعىزباستى انالار سابيلەرىن تاستاپ كەتەدى. سونداي-اق، كەيبىرەۋلەرى تۇرعىن ءۇي مەن بالانى اسىراۋ ءۇشىن قاراجاتتىڭ جوقتىعىنا، تۋىستارى تاراپىنان قولداۋدىڭ بولماۋىنا بايلانىستى جانە نارەستەنىڭ بويىندا تۋا بىتكەن اۋىتقۋ بولعان جاعدايدا باۋىر ەتى بالاسىنان باس تارتىپ جاتادى، - دەپ جازىلعان نۇرلان قاسىموۆتىڭ جاۋابىندا.
ستاتيستيكالىق مالىمەتتەرگە سۇيەنسەك، 70 جىلدىق تاريحى بار سابيلەر ۇيىنە 2014 -جىلى 120 بالا، 2015 -جىلى 149 بالا جانە بيىل 128 بالا قابىلدانعان. 2016 -جىلى توعىز ايدىڭ ىشىندە 24 بالانى اتا-اناسى قايتارىپ العان. سونداي-اق، 2015 -جىلى 10 بالا، بيىلعى جىلى ءتورت بالا اسىراپ الىنعان بولسا، 14 بالا پاتروناتتىق جانە قامقورشى وتباسىلارعا تاپسىرىلعان.
