قازاقستاندىق عالىمدار يادرولىق قارۋدى تاراتپاۋ جونىندەگى ورتالىقتان 75 ميلليون دوللار گرانت الدى
بۇل تۋرالى بۇگىن ق ر پارلامەنتى ءماجىلىسىنىڭ جالپى وتىرىسىندا «حالىقارالىق عىلىمي-تەحنيكالىق ورتالىقتىڭ قىزمەتىن جالعاستىرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن تانىستىرعان ق ر ءبىلىم جانە عىلىم ءمينيسترى ەرلان ساعاديەۆ ءمالىم ەتتى.
«حالىقارالىق عىلىمي-تەحنيكالىق ورتالىق - ۇكىمەتارالىق ۇيىم. ورتالىق يادرولىق قارۋدى تاراتپاۋ ماقساتىندا ەۋروپالىق وداق، رەسەي، ا ق ش جانە جاپونيا اراسىنداعى كەلىسىم رەتىندە 1992-جىلى قۇرىلعان. ق ر ورتالىققا 1995-جىلى قوسىلعان. ورتالىقتىڭ قىزمەتىن جالعاستىرۋ تۋرالى كەلىسىمگە 2015-جىلى استانا قالاسىندا قول قويىلعان. كەلىسىمدە ورتالىقتىڭ شتاب-پاتەرىن رەسەيدەن قازاقستانعا كوشىرۋ قاراستىرىلعان. كەلىسىمگە سايكەس، ق ر ورتالىققا قىزمەتتىك ورىنجاي بەرەدى. سونىمەن قاتار وسى ورىنجايعا قىزمەت كورسەتۋدى، كوممۋنالدىق جانە كۇزەت قىزمەتتەرىن تولەۋدى قامتاماسىز ەتەدى.
ورتالىق قىزمەتىن جالعاستىرۋ تۋرالى كەلىسىم ءالى كۇنگە دەيىن راتيفيكاتسيالانباعان. دەگەنمەن، قازىرگى ۋاقىتتا بۇل ورتالىق نازاربايەۆ ۋنيۆەرسيتەتىنىڭ عيماراتىندا تەگىن ورنالاستىرىلعان. شىعىنداردى نازاربايەۆ ۋنيۆەرسيتەتى تولەپ وتىر. جىلىنا 18 ميلليون تەڭگە كەتەدى. قازىرگى كەزدە مينيسترلىك «استانا ەكسپو-2017» كومپانياسىمەن جانە «استانا» قارجى ورتالىعىمەن بىرلەسىپ، ورتالىقتىڭ شتاب-پاتەرىن كورمە وتكەن سوڭ «ەكسپو» عيماراتىنىڭ بىرىنە ورنالاستىرۋ ماسەلەسىن قاراستىرۋدا»، - دەدى مينيستر.
ونىڭ اتاپ وتۋىنشە، كەلىسىمگە سايكەس ورتالىقتىڭ نەگىزگى مىندەتى - جاپپاي قىرىپ-جويۋ قارۋى سالاسىنداعى عالىمدار مەن ينجەنەرلەرگە باسقا جۇمىسقا ورنالاسۋعا، ءوز ءبىلىمىن بەيبىت ماقساتقا پايدالانۋعا مۇمكىندىك بەرۋ. سونىمەن بىرگە بۇل ورتالىقتىڭ باستى ماقساتى - جوبالاردان پايدا تابۋ.
«ورتالىق ءوز قىزمەتىن ەكى باعىت - عىلىمي-تەحنيكالىق جوبالارعا گرانت ءبولۋ، كونفەرەنتسيالار مەن سەمينارلار وتكىزۋ بويىنشا ىسكە اسىرادى. ءار جوبا بويىنشا ورتالىق بولەتىن گرانت سوماسى عىلىمي ۇيىمنىڭ سۇراعان سوماسىنا بايلانىستى ورتاشا 100 مىڭنان 600 مىڭ ا ق ش دوللارىنا دەيىن بولادى. جوبالاردىڭ جالپى ۇزاقتىعى - 2-3 جىل. وتكەن 20 جىلدىڭ ىشىندە قازاقستان عالىمدارىنا ورتالىق بولگەن گرانتتار كولەمى 75 ميلليون دوللاردى نەمەسە گرانتتاردىڭ جالپى سانىنىڭ 13 پايىزىن قۇرادى. وسى كەزەڭدە 206 گرانت 5 مىڭداي قازاقستاندىق عالىمدارعا ءبولىندى»، - دەدى ە. ساعاديەۆ.
ونىڭ سوزىنە قاراعاندا، ورتالىق مىناداي عىلىمي باعىتتار ۇسىنادى: بيوتەحنولوگيا، يادرولىق رەاكتورلار، ماتەريالتانۋ، ەكولوگيا، حيميا جانە فيزيكا.
«2014-جىلى قازاقستان عالىمدارىنا ەڭ كوپ گرانت ءبولىندى - 1,5 ميلليون دوللار. ال 2016-جىلى ەلىمىزگە قارجى بولىنبەگەن. راتيفيكاتسيالاۋ قاجەت بولىپ تۇر. قازىرگى ۋاقىتتا تاپسىرىلعان قازاقستاندىق جوبالاردىڭ سانى 50 پايىزدى قۇرايدى. عالىمدار جۇمىستارىن ىستەۋگە دايىن. قارجىلاندىرۋ ءۇش كەزەڭمەن جۇرگىزىلەدى. تاپسىرىلعان قازاقستاندىق جوبالار ۆەدومستۆوارالىق عىلىمي-تەحنيكالىق كەڭەستە قارالادى. اتالعان كەڭەستىڭ قۇرامىنا قازاقستاندىق مەملەكەتتىك ورگانداردىڭ جانە ءتيىستى ۇيىمداردىڭ وكىلدەرى كىرەدى. 2- كەزەڭدە تاڭدالعان جوبالار ورتالىقتىڭ عىلىمي-تەحنيكالىق كوميتەتىنە ۇسىنىلادى. بۇل كەزەڭنەن وتكەن جوبالار ورتالىقتىڭ باسقارۋشىلار كەڭەسىنە قاراۋعا تۇسەدى. 5 داۋىستىڭ ىشىندە ەلىمىز ءبىر داۋىسقا يە»، - دەپ اتاپ وتكەن مينيستر، بۇل كەلىسىمدى راتيفيكاتسيالاۋ ەلىمىزدىڭ عىلىمى ءۇشىن ماڭىزدى ەكەندىگىن باسا ايتتى.
