جازۋشى جاقسىلىق ساميت ۇلىنىڭ 75 جىلدىق مەرەيتويى ءوتتى - فوتو
بۇل جولعى ەسكە الۋ كەشىنىڭ باستى ەرەكشەلىگى جازۋشىنىڭ شىعارماشىلىعىنا قوسا، قازاق ادەبيەتىنىڭ دە وزەكتى ماسەلەلەرى تالقىلاندى. سوندىقتان دا كونفەرەنسيا اتاۋى «قازىرگى قازاق پروزاسىنىڭ وزەكتى ماسەلەلەرى» دەپ اتالدى.
ەسكە الۋ كەشىنىڭ بەت اشار ءسوزىن قازاقستان جازۋشىلار وداعى باسقارما ءتوراعاسىنىڭ 1- ورىنباسارى، بەلگىلى اقىن مارالتاي رايىمبەك ۇلى باستادى. ارى قاراي حالىق جازۋشىسى قابدەش ءجۇمادىلوۆ مىنبەگە كوتەرىلىپ، قالامداس دوسى، زامانداس ءىنىسى تۋرالى كەڭىنەن كوسىلىپ، ارعى-بەرگى تاريحقا توقتالىپ، ەل ەسىندە قالاتىنداي تۇشىمدى ەستەلىك ايتتى. «دۇنيە ءجۇزى قازاقتارىنىڭ قاۋىمداستىعىنىڭ» 1- ورىنباسارى تالعات ماماشەۆ ءوز سوزىندە جازۋشى تۋرالى جاقسى لەبىز ءبىلدىرىپ، تالانتقا دەگەن قۇرمەتىن جەتكىزدى. قابدەش ءجۇمادىلوۆ پەن تالعات ماماشەۆ جازۋشىنىڭ جاڭادان شىققان «سارالا قاز» اتتى اڭگىمەلەر جيناعىنىڭ تۇساۋىن كەستى.
كونفەرەنسيانىڭ تاقىرىبىنا سايكەس م. و. اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى گۇلجاھان وردا، م. اۋەزوۆ اتىنداعى ادەبيەت جانە ونەر ينستيتۋتىنىڭ جەتەكشى عىلىمي قىزىمەتكەرى، فيلولوگيا عىلىمدارىنىڭ كانديداتى دوتسەنت مامبەتوۆ جولداسبەك، بەلگىلى جۋرناليست، اقىن ەسەي جەڭىس ۇلى قاتارلى كوپتەگەن ادەبيەتشى عالىمدار عىلىمي باياندامالار جاساپ جينالىستىڭ سالماعىن ارتتىرا ءتۇستى.
كونفەرەنسيانىڭ ماتەريالدارى كىتاپ بولىپ دايىندالىپ وقىرماندارعا تاراتىلدى.
كونفەرەنسيا سوڭىندا «ەر جانىبەك» حالىقارالىق قورى قوناقتارعا داستارحان جايىپ، مارقۇمعا ارناپ قۇران باعىشتادى.
erjanibek.com
