قازاقستاننان كەلگەن 75 قولونەرشى زايەد شەيحىنىڭ مادەني مۇراسى فەستيۆالىنە قاتىسۋدا

ءابۋ- دابي. قازاقپارات - بىرىككەن اراب امىرلىكتەرىنىڭ استاناسى- ءابۋ-دابي قالاسىندا ەلدىڭ نەگىزىن قالاۋشى زايەد شەيحتىڭ مادەني مۇراسى فەستيۆالى اشىلدى.

2009 -جىلدان بەرى جىلىنا ءبىر رەت ءوتىپ كەلە جاتقان شارانىڭ ماقساتى - ءارتۇرلى ەلدەردىڭ اراسىندا مادەني ىنتىماقتاستىقتى كەڭەيتۋ، سونداي-اق ب ا ءا تۇرعىندارىن ءارتۇرلى حالىقتىڭ ۇلتتىق- مادەني قۇندىلىقتارىمەن تانىستىرۋ. فەستيۆال ب ا ءا مەملەكەتى قۇرىلعان 2 جەلتوقسان - ۇلتتىق مەرەكەسىن تويلاۋ اياسىندا ۇيىمداستىرىلىپ وتىر.

قولونەرشىلەردىڭ فەستيۆالى بيىل 19 -قاراشا مەن 12 -جەلتوقسان ارالىعىندا وتەدى. قازاقستان رەسپۋبليكاسىنىڭ بىرىككەن اراب امىرلىكتەرىندەگى ەلشىلىگى شەيح حاليفا بەن زايد اتىنداعى قايىرىمدىلىق قورىمەن بىرلەسە وتىرىپ، 75 قولونەر شەبەرىنىڭ قاتىسۋىن ۇيىمداستىرعان. سونىمەن قاتار، «نۇر» حالىق بيلەرىنىڭ انسامبلى مەن ۇلتتىق تاماق دايىندايتىن اسپازدار دا فەستيۆالدە ءجۇر.

«ب ا ءا اۆتوراديوسى» اتتى ورىس ءتىلدى راديوعا سۇحبات بەرگەن ق ر- نىڭ امىرلىكتەردەگى ەلشىلىگىنىڭ مادەني ىستەر جونىندەگى اتتاشەسى يبراگيم اكۋشيەۆ بىلتىر فەستيۆالگە 450 مىڭ ادام كەلگەنىن حابارلاعان. ونىڭ ايتۋىنشا، مادەني فەستيۆالگە بيىل ودان دا كوپ ادام كەلەدى دەپ جوسپارلانىپ وتىر. سونىمەن قاتار، ول قازاقستان پاۆيلونى مازمۇنى مەن ادەمىلىگى بويىنشا ەڭ تانىمال پاۆيلونداردىڭ ءبىرى ەكەنىن اتاپ وتكەن.

جالپى، فەستيۆالگە باحرەين، ماروككو، ساۋد ارابياسى، ومان، مىسىر، اۋعانستان مەن بوسنيا ەلدەرىنىڭ وكىلدەرى قاتىسۋدا.

اۆتور: كەنجەكەي توقتامۇرات قىزى