وڭتۇستىك كورەيادا كوروناۆيرۋس جۇقتىرعاندار سانى 7513 ادامعا جەتتى
سەۋل. قازاقپارات - سەيسەنبى كۇنى وڭتۇستىك كورەيا كوروناۆيرۋس جۇقتىرعان 131 جاڭا جاعداي تۋرالى حابارلادى.
ەلدە ۆيرۋس جۇقتىرعانداردىڭ جالپى سانى 7513 ادامعا جەتتى، دەپ حابارلايدى قازاقپارات Yonhap اگەنتتىگىنە سىلتەمە جاساپ.
كورەيا اۋرۋدى باقىلاۋ جانە الدىن الۋ ورتالىعىنىڭ (KCDC) مالىمەتىنە سايكەس، قازىرگى ۋاقىتتا 54 ادام وتكەن جىلدىڭ سوڭىندا قىتايدا پايدا بولعان رەسپيراتورلىق ۆيرۋستان كوز جۇمدى. قايتىس بولعانداردىڭ كوبى - سوزىلمالى اۋرۋمەن اۋىرعان ەگدە جاستاعى پاتسيەنتتەر.
راستالعان جاعدايلاردىڭ 63 پايىزعا جۋىعى 2,5 ميلليون حالىق تۇراتىن، ۇلكەندىگى جونىنەن ەلدىڭ ءتورتىنشى قالاسى تەگۋداعى سينچحوندجي (Shincheonji) ءدىني سەكتاسىنىڭ فيليالىمەن بايلانىستى.
جاڭادان ۆيرۋس جۇقتىرۋ قارقىنى سوڭعى ۋاقىتتا ءبىرشاما باسەڭسىدى. بۇل دەنساۋلىق ساقتاۋ ورگاندارىنىڭ ۆيرۋستىڭ تارالۋ ورتالىعىندا ورنالاسقان 210000 سينچحوندجي باعىتىن ۇستانۋشىلاردى جاپپاي تەكسەرۋدى اياقتادى.
بيلىك ۆيرۋستىڭ جاڭا وشاعىنىڭ پايدا بولۋىنا ءالى دە الاڭداۋلى ەكەنىن اتاپ وتكەن.
كورەيا اۋرۋدى باقىلاۋ جانە الدىن الۋ ورتالىعىنىڭ (KCDC) مالىمەتىنشە، كەشە انىقتالعان 131 جاڭا جاعدايدىڭ 92 ءسى تەگۋدا، 10 ى كورشىلەس سولتۇستىك كەنساندو پروۆينتسياسىندا تىركەلگەن. تەگۋدا اۋرۋ جۇقتىرعانداردىڭ جالپى سانى – 5663، سولتۇستىك كەنساندودا 1117 ادامعا جەتتى.
سونداي-اق سەۋلدە ۆيرۋس جۇقتىرعان 11 جاڭا جاعداي تۋرالى حابارلاندى.
