وتكەن جىلى پوشتا ارقىلى اتىراۋدان وزبەكستانعا 750 ميلليون تەڭگە كەتكەن

اتىراۋ. قازاقپارات - 2015 -جىلى اتىراۋ وبلىسىنان وزبەكستان ازاماتتارى پوشتا ارقىلى 750 ميلليون تەڭگە اقشا اۋدارىمدارىن جاساعان، تاعى 1 ميلليارد تەڭگەنى قولما-قول الىپ كەتكەن، دەپ مالىمدەدى اتىراۋ وبلىسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ەركىن شپانوۆ ايماقتىق كوممۋنيكاتسيا قىزمەتى بريفينگىندە.

«كوشى- قون پوليتسياسىنىڭ اقپاراتى بويىنشا، 2015 -جىلى اتىراۋ وبلىسىنا ءتۇرلى ەلدەردەن 56117 ازامات كەلگەن. ونىڭ اراسىندا 16 مىڭ ادام - وزبەكستان ازاماتتارى. ق ر ۇلتتىق بانكى ءبولىمىنىڭ حابارلاۋىنشا، ءبىر جىلدا كورشى ەل ازاماتتارى 750 ميلليون تەڭگەنى رەسمي پوشتالىق اقشا اۋدارىمى ارقىلى ءوز وتاندارىنا جىبەردى. ءبىزدىڭ ەسەبىمىز بويىنشا، بۇل اتىراۋ ايماعىنان شىعارىلعان قاراجاتتىڭ ءبىر بولىگى عانا. 1 ميللياردقا جۋىق اقشانى اتىراۋدان وزبەكستانعا قولما-قول الىپ كەتكەن»، - دەدى ە. شپانوۆ.