75 مىڭنان استام ازامات ءوزىن قۇمار ويىندارعا قاتىسۋعا شەكتەدى
استانا. KAZINFORM - ەلىمىزدە 75 مىڭنان استام ادام ەرىكتى تۇردە قۇمار ويىندارعا جانە ءباس تىگۋگە قاتىسۋدان ءوزىن شەكتەدى.
مۇنداي دەرەك اشىق ن ق ا پورتالىنا تالقىلاۋعا شىعارىلعان قازاقستان رەسپۋبليكاسىندا زاڭسىز ويىن بيزنەسى مەن لۋدومانياعا قارسى ءىس- قيمىل بويىنشا 2024-2026 -جىلدارعا ارنالعان كەشەندى جوسپاردا كەلتىرىلگەن.
«تۋريزم جانە سپورت مينيسترلىگى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن، «ۇلتتىق اقپاراتتىق تەحنولوگيالار» ا ق- مەن بىرلەسىپ قازاقستان رەسپۋبليكاسى ازاماتتارى مەن رەزيدەنتتەرىن قۇمار ويىندارعا جانە ءباس تىگۋگە قاتىسۋدان ءوز بەتىنشە شەكتەۋ جونىندەگى قىزمەتتى اۆتوماتتاندىرۋ بويىنشا جۇمىستى اياقتادى. 2024 -جىلدىڭ ناۋرىز ايىنان باستاپ قازاقستان ازاماتتارى، سونداي- اق قازاقستان رەسپۋبليكاسى اۋماعىندا تۇراقتى تۇراتىن شەتەلدىكتەر «eGov mobile» موبيلدىك قوسىمشاسى ارقىلى 6 ايدان 12 ايعا دەيىنگى مەرزىمگە وزدەرىن قۇمار ويىندارعا جانە ءباس تىگۋگە قاتىسۋىن ەرىكتى تۇردە شەكتەۋ تۋرالى ءوتىنىش بەرە الادى»، - دەلىنگەن قۇجاتتا.
بۇل ءراسىم «ويىن بيزنەسى تۋرالى» قازاقستان رەسپۋبليكاسى زاڭىنىڭ 15-1-بابىندا كوزدەلگەن جانە اۆتوماتتاندىرۋعا دەيىن ءتيىستى تۇلعالاردى ءوزىن- ءوزى شەكتەگەندەر تىزىمىنە قوسۋ 8 جۇمىس كۇنى ىشىندە قاعاز فورماتتا جۇزەگە اسىرىلدى. جاڭا قىزمەت وتىنىشتەردى وڭدەۋ مەرزىمىن ەداۋىر قىسقارتادى جانە قۇمار ويىندارعا قاتىسۋدان ءوزىن- ءوزى شەكتەۋ ءراسىمىن جەڭىلدەتەدى. بۇل بارلىق ازاماتتارعا، ەڭ الدىمەن قۇمار ويىندارمەن شەكتەن تىس اۋەستەنەتىن تۇلعالارعا بارلىق ليتسەنزيالانعان ويىن مەكەمەلەرى مەن بۋكمەكەرلىك كەڭسەلەردىڭ زاڭدى سايتتارىنا كىرۋگە لەزدە توسقاۋىل قويۋعا مۇمكىندىك بەرەدى. بۇگىنگى كۇنى 75 مىڭنان استام ازامات وسى قىزمەتپەن پايدالاندى.
