تۇماۋعا قارسى ەكپە 74 مىڭ استانالىققا سالىنادى
«2017-2018 -جىلدارعا ارنالعان ەپيدەميا ماۋسىمىنا 65 ميلليون تەڭگەگە جۋىق قارجى ءبولىندى. سوعان سايكەس، 74 مىڭعا جۋىق قالا تۇرعىنىن تۇماۋعا قارسى تەگىن ۆاكسينالاۋدى كوزدەپ وتىرمىز. الىنعان ۆاكسينا قالانىڭ ەمحانالارىنا تاراتىلا باستالدى»، - دەدى ت. مۇراتوۆ.
ونىڭ ايتۋىنشا، تەگىن ەكپەمەن حالىقتىڭ دەكرەتتەلگەن توبى، ياعني ءجيى اۋىراتىن بالالار، ءتۇرلى توپتاعى مۇگەدەكتەر مەن ديسپانسەرلىك ەسەپتە تۇرعان ناۋقاستار قامتىلادى.
«قازىر ەمحانالاردا بۇل تىزىمدەر تولىقتىرىلىپ جاتىر. بەكىتىلگەن تىزىمگە كىرەتىن ادامدار ەمحانالارعا شاقىرىلىپ، تەگىن ەكپە جاسايتىن بولادى. سونداي-اق، ەمحاناداعى تەراپيەۆت دارىگەرلەر بەلگىلى ءبىر ناۋقاسقا ۆاكسيناتسيا جاساۋ كەرەك دەگەن كورسەتىم قويسا، ول ادامدارعا دا تەگىن جاسايمىز»، - دەدى باسقارما باسشىسىنىڭ ورىنباسارى.
بۇدان بولەك، اتالعان توپقا جاتپايتىن ازاماتتار ءوز ەرىكتەرىمەن سالدىرعىسى كەلسە ەكپەنى اقىلى تۇردە جاساتا الادى.
«ۆاكسيناتسيا جاساتقىسى كەلگەن ادام ەمحاناعا كەلىپ، اقىلى تۇردە جاساۋعا مۇمكىندىگى بار. جالپى، استانادا ۆاكسينا تاپشىلىعى بولمايدى. سەبەبى، اقىلى قىزمەت ءۇشىن بيۋدجەت ەسەبىنەن ەمەس، سول ەكپەنى الاتىن ازاماتتىڭ قالتاسىنان تولەنەدى. شامامەن ءبىر ەكپە 2200-3500 تەڭگە ارالىعىندا تۇرادى»، - دەدى مەديا ورتالىقتىڭ تىلشىسىنە بەرگەن سۇحباتىندا تيمۋر مۇراتوۆ.
ايتا كەتەرلىگى، استانادا تۇماۋعا قارسى ەكپە 13 قالالىق ەمحانا مەن 3 وتباسىلىق-دارىگەرلىك ورتالىقتا جۇرگىزىلەدى. بيۋدجەت قارجىسىنا وسى كۇنگە دەيىن رەسەيدە شىعارىلعان «گريپپول» ۆاكسيناسىنىڭ 14760 دوزاسى الىندى. الداعى ۋاقىتتا تاعى 58826 دوزانى الۋ جوسپارلانىپ وتىر.
