باتىس قازاقستاندىق جاۋىنگەردىڭ جەرلەنگەن ورنى 73 جىل وتكەن سوڭ انىقتالدى
ورال قالاسىندا تۇراتىن بەلگىلى ايتىسكەر اقىن، ءانشى، قازاقستاننىڭ ەڭبەك سىڭىرگەن قايراتكەرى، قازتالوۆ اۋدانىنىڭ قۇرمەتتى ازاماتى حاتيموللا بەردىعاليەۆتىڭ ايتۋىنشا، اتاسى بەردىعالي ساتەك دەگەن بالاسىنىڭ حابارسىز كەتكەنىن اڭگىمەلەپ وتىرادى ەكەن. ونىڭ دەرەگىن قازتالوۆ اۋداندىق ارداگەرلەر كەڭەسىنىڭ ءتوراعاسى ءۋاليوللا ابىشيەۆ عالامتور ارقىلى تاۋىپ بەرىپتى. سويتسە، ساتەك ۆولگوگراد وبلىسى كلەتسكي اۋدانى راسپولينسكايا ستانيتساسىندا جەرلەنىپتى.
جۋىردا ح. بەردىعاليەۆ قازتالوۆ، بوكەي ورداسى جانە جانىبەك اۋدانىنان ۆولگوگراد قالاسىنا بارعان دەلەگاتسيا قۇرامىندا اكەسىنىڭ اعاسى جەرلەنگەن جەردى كوزبەن كورىپ قايتتى. اتالعان ستانيتسا ۆولگوگراد قالاسىنان 240 شاقىرىمداي جەردە ورنالاسقان ەكەن. ۆولگوگرادتاعى «قازاقستان مۇراسى» قايىرىمدىلىق قورىنىڭ ءتوراعاسى ايبولات احمەتوۆتىڭ باستاۋىمەن وكرۋگ باسشىلارىنىڭ قابىلداۋىندا بولىپ، ءبىراز مالىمەت العان. ستانسا ماڭىندا 1942-جىلدىڭ 19-23- قاراشاسىندا قيان-كەسكى شايقاس بولىپ، سوندا قازا تاپقان 600 دەي قازاق جاۋىنگەرى باۋىرلاستار زيراتىنا جەرلەنگەن. سونىڭ ىشىندە س. بەردىعاليەۆتىڭ اتى-ءجونى دە جازۋلى تۇر.
«اعامىزدىڭ باسىنا تۋعان جەرىنىڭ ءبىر ۋىس توپىراعىن سالىپ، دۇعا وقىپ قايتتىق. قايران اتام بالاسىنىڭ ءبىر دەرەگىن بىلمەستەن ومىردەن ءوتتى-اۋ»، - دەيدى ح. بەردىعاليەۆ.
اۆتور: ەلجان ەرالى
