توقسان جاستاعى مايدانگەر ي. عاليۋللين ت-72 تانكىسىن جۇرگىزدى - فوتو

 استانا. قازاقپارات - ق ر ق ك- ءنىڭ اسكەري قىزمەتشىلەرى ۇلى وتان سوعىسى ارداگەرىنىڭ تىلەگىن ورىندادى. «استانا» وڭىرلىك قولباسشىلىعىندا «سپاسسك» وقۋ- جاتتىعۋ ورتالىعىنىڭ بازاسىندا ۇلى وتان سوعىسىنىڭ ارداگەرى، تانكىشى يسماعيل عاليۋللين جاس اسكەري قىزمەتشىلەرگە شەبەرلىك سىنىبىن وتكىزدى.

  سەكسەننىڭ سەڭگىرىنەن اسىپ، توقسان جاسقا كەلگەنىنە قاراماستان، جاۋىنگەرلىك ماشينانى باسقارۋ داعدىسىن جوعالتپاي ارداگەر ت-72 تانكىسىنىڭ يىنتىرەگىنە وتىردى، دەپ حابارلايدى ق ر  ق م باسپا ءسوز قىزمەتى.

 قازىرگى كەزدە ارميانىڭ جاراعىندا اناعۇرلىم اۋىر قۇرىشتى، قارۋ- جاراعى مەن تەحنيكالىق تۇرعىدا جابدىقتالعان زاماناۋي جاۋىنگەرلىك ماشينالار بار ەكەنىن ايتا كەتەيىك. الايدا، تانكىشى ارداگەر ءۇشىن جاڭا تەحنيكانى مەڭگەرۋ اسا ءبىر قيىندىق تۋعىزعان جوق. 90 جاستاعى يسماگيل عاليۋللين ۇلى وتان سوعىسى جىلدارى تانكىشى بولدى جانە ءوزىنىڭ قىزمەت ەتكەن جىلدارىن ەسىنە تۇسىرگىسى كەلدى. «استانا» وڭىرلىك قولباسشىلىعىنىڭ اسكەري قىزمەتشىلەرى ارداگەرگە بۇل جايتتى ەسىنە الۋعا كومەكتەستى. ۇلى وتان سوعىسى جىلدارىندا عاليۋللين اتى شۋلى ت-44 تانكىسىنىڭ دىزگىنىن ۇستاپ شايقاستى. بۇكىل ەۋروپانى ارتقا تاستاپ، مايدان جولىن بەرليندە اياقتادى.

 جاقىندا عانا ۇلى وتان سوعىسىنىڭ باتىرى ءوزىنىڭ 90 جىلدىعىن اتاپ ءوتتى. «استانا» وڭىرلىك قولباسشىلىعى اسكەرلەرىنىڭ قولباسشىسى گەنەرال- مايور سۇلتان كامالەتدينوۆ ارداگەردى قۇتتىقتاپ، باعالى سىيلىق تابىس ەتتى. «يسماعيل نيعمات ۇلى، ءبىز سىزگە ۇزاق عۇمىر تىلەيمىز جانە ءارقاشان كومەكتەسۋگە دايىنبىز. بۇگىنگى تاڭدا ءسىز سياقتى ۇلى وتان سوعىسىنىڭ باتىرلارى وتە از. ءبىز ەرلىگىڭىزدى ەشقاشان ۇمىتپايمىز»، - دەپ اتاپ ءوتتى قولباسشى ءوز سوزىندە.