الماتىنى 720 كۇن باسقارعان باقىتجان ساعىنتايەۆ جەلىدە جازبا قالدىردى
الماتى. قازاقپارات- باقىتجان ساعىنتايەۆ الماتىنى 720 كۇن باسقاردى. بۇل تۋرالى ەكس- اكىم Ғacebook - تەگى پاراقشاسىندا جازدى، دەپ حابارلايدى قازاقپارات ءتىلشىسى.
«بۇگىن مەن ءوز لاۋازىمىمدى جاڭا اكىمگە تاپسىرامىن. وسىدان تۋرا 720 كۇن بۇرىن پرەزيدەنت ماعان الماتى اكىمدىگىن باسقارۋدى سەنىپ تاپسىردى. بۇل ءۇشىن مەملەكەت باسشىسىنا ريزامىن. مەن سىزدەرمەن ۇنەمى بىرگە بولدىم. قالا ءومىرىن جاقسارتۋعا بار كۇش- جىگەرىمدى ارنادىم. ۇزاق مەرزىمدى «الماتى-2050» ستراتەگياسىن قابىلداپ، قالانى دامىتۋدىڭ كەلەشەگىن ايقىندادىق. پرەزيدەنتتىڭ «شەتسىز قالا» قاعيداتى نەگىزىندە قالاعا قوسىلعان اۋدانداردىڭ تۇيتكىلدى ماسەلەلەرىن شەشۋگە باسا نازار اۋدارىپ، «جاڭا الماتى» كەشەندى باعدارلاماسىن قابىلدادىق. ءبىز الەۋمەتتىك ماسەلەلەردى شەشۋ ءۇشىن الماتىنى اگلومەراتسيا رەتىندە دامىتۋ جانە وبلىستىڭ قالامەن شەكتەسەتىن 4 اۋدانىندا جۇمىس ورىندارىن قۇرۋ جۇمىسىن كۇن تارتىبىنە قويدىق. دەنساۋلىق ساقتاۋ جۇيەسى نىعايتىلدى. ءبىر جىلدىڭ ىشىندە ەڭ زاماناۋي جابدىقتارمەن جابدىقتالعان 3 جۇقپالى اۋرۋلار اۋرۋحاناسىن ىسكە قوستىق. پاندەميا كەزىندە دەنساۋلىق ساقتاۋ جۇيەسىندەگى داعدارىسقا جول بەرىلمەدى»، - دەپ جازدى ول.
سونىمەن قاتار، ول مەكتەپتەردى جەدەل سالۋ باعدارلاماسى قولعا الىنعانىن تىلگە تيەك ەتتى.
«تەك 2021 -جىلى 33 جاڭا مەكتەپ سالىندى. بۇل - مەكتەپتەردەگى ورىن تاپشىلىعىن ازايتۋعا باعىتتالعان تۇبەگەيلى قادام بولدى. ەكولوگيانى جاقسارتۋ ءۇشىن جۇيەلى ەكى شەشىم قابىلداندى: ميلليون اعاش وتىرعىزۋ جانە ەكىنشى ج ە و- نى گازعا اۋىستىرۋ. مەنىڭ ءاربىر جۇمىس كۇنىم سىزدەردىڭ كوز الدىلارىڭىزدا ءوتتى. وزدەرىڭىزبەن ءاردايىم كەزدەسىپ، اقىلداسىپ وتىردىق. اپتا سايىن Akimat Live تىكەلەي ەفيرىنە شىقتىم. اتقارىلعان شارالار تۋرالى ۇنەمى حاباردار بولدىڭىزدار. بىرگە اتقارىلعان جۇمىس ءۇشىن الماتىلىقتارعا العىس ايتامىن! قالامىزعا جانە بارشا الماتىلىقتارعا باقىتتى عۇمىر تىلەيمىن! الماتى ماڭگى مەنىڭ جۇرەگىمدە»، - دەپ اتاپ ءوتتى باقىتجان ساعىنتايەۆ.
بۇگىن مەملەكەت باسشىسىنىڭ جارلىعىمەن باقىتجان ءابدىر ۇلى ساعىنتايەۆ الماتى قالاسىنىڭ اكىمى لاۋازىمىنان باسقا جۇمىسقا اۋىسۋىنا بايلانىستى بوساتىلدى. الماتى اكىمى بولىپ ەربولات دوسايەۆ تاعايىندالدى.
اۆتور: الما مۇقانوۆا
