ماڭعىستاۋدا 72 جاستاعى كەيۋانا 5 كەلىنىنە جالاقى تولەپ وتىر

استانا. قازاقپارات - «اتامەكەن» ۇلتتىق كاسىپكەرلەر پالاتاسى باسقارما ءتوراعاسىنىڭ ورىنباسارى ەلدار جۇماعازيەۆ ماڭعىستاۋ وبلىسى مۇنايلى اۋدانىندا 72 جاستاعى كەيۋانانىڭ شاعىن بيزنەس اشىپ، بەس كەلىنىن جۇمىسپەن قامتاماسىز ەتىپ وتىرعانىن اڭگىمەلەپ بەردى. بۇل تۋرالى Sputnik قازاقستان حابارلايدى.

ماڭعىستاۋ وبلىسىنداعى اجەي اۋىلداعى بيزنەستى دامىتۋعا ارنالعان «Bastau بيزنەس» باعدارلاماسى اياسىندا وقىپ، ءوز بيزنەس- جوباسىن ازىرلەگەن.

«مۇنايلى اۋدانىندا 72 جاستاعى كەيۋانامىز وقىپ شىقتى. اپاي كومپيۋتەر كورمەيدى، قالام مەن قاعازعا بيزنەس- جوباسىن جازىپ شىقتى. ول كىسىگە ءبىز كومەكتەستىك. بەس كەلىنى بار ەكەن. بىزدەن 4-5 ميلليون اقشا الىپ، ناۋبايحانا اشىپ، بەس كەلىنىنە قازىر جالاقى تولەپ وتىر»، - دەپ اڭگىمەلەدى جۇماعازيەۆ ماجىلىستە وتكەن وتىرىستا.

ونىڭ ايتۋىنشا، اۋىلداعى بيزنەستىڭ الەۋەتى زور. «Bastau بيزنەس» جوباسى اياسىندا كاسىپكەرلىكتىڭ قىر- سىرىن بىلۋگە تالپىنىپ وتىرعان ادامدار كوپشىلىك.

«ادامداردا بيزنەسكە دەگەن تالپىنىس بار ەكەن. بىزدە وسىعان بايلانىستى كۇمان بولعان. قازىر وقىپ جاتقان ادامداردىڭ جەتپىس پايىزىنا دەيىنگىسى مەكتەپكە بيزنەس يدەياسىمەن كەلىپ وتىر. مىسالى، ەرەيمەنتاۋدا اشىلعان مەكتەپكە ادامدار ءجۇز شاقىرىم جەردەن كەلىپ كۇندە وقيدى. وسىنداي باعدارلامالارعا سۇرانىس كوپ»، - دەدى ول.

بۇل جوبا اۋەلى ەكى جىل پيلوتتىق نەگىزدە جۇزەگە اسىرىلعان. ەندى بيىلعى جىلدان باستاپ كوپ اۋىلدى قامتۋ ماقساتىندا سەكسەن اۋداندا مەكتەپتەر اشىلعان.

«ياعني، اۋدان ورتالىقتارىنىڭ ەلۋ پايىزىندا بيزنەس مەكتەپتەر اشىلدى. ەڭ الدىمەن، تەست ارقىلى ادامنىڭ بيزنەسكە دەگەن ىنتاسى، يكەمدىلىگى تەكسەرىلىپ، قارىزىن تولەي الا ما، جوق پا - وسى جاعى انىقتالادى. 4415 جۇمىسسىز تەستىلەۋدەن ءوتىپ، 3213 ادام قازىر مەكتەپتە وقىپ جاتىر. جىل قورىتىندىسى بويىنشا 15 مىڭ ادامدى وقىتىپ شىعارۋىمىز كەرەك جانە 3 مىڭ بيزنەس- جوبانى قارجىلاندىرۋ دەڭگەيىنە جەتكىزۋىمىز قاجەت. ەلىمىزدىڭ تۇكپىر- تۇكپىرىنەن ىرىكتەلىنىپ العان 135 بيزنەس-ترەنەر ەكى اپتا بويى بىزدەن ترەنينگ ءوتتى. اۋىلعا قازىر 80 ترەنەردى جىبەردىك»، - دەدى جۇماعازيەۆ.

كەلەسى جىلى 160 اۋداندا بيزنەس مەكتەپتەرىن اشۋ جوسپارلانعان. بۇدان بولەك، ەڭبەك مينيسترلىگىنىڭ ۇسىنىسى بويىنشا قالالاردا دا اشۋ كوزدەلىپ وتىر.

«بۇل استاناداعى كابينەتتەردە ەمەس، ەل ارالاپ، حالىقتىڭ قاجەتتىلىگىن تىڭداپ، پايدا بولعان جوبا. باعدارلامانىڭ 18 ميلليون تەڭگەگە دەيىن جىلدىق 6 پايىز مولشەرلەمەمەن وڭتايلى قارجىلاندىرۋ، بيزنەس اشقان سوڭ 12-ايعا دەيىنگى قولداۋ كورسەتۋ سياقتى ارتىقشىلىقتارى بار. سونىمەن بىرگە مەملەكەت كەپىلدىكپەن دە جاردەمدەسەدى»، - دەدى ول.