بيىل 71 مىڭ جاستىڭ تەگىن تەحنيكالىق ءبىلىم الۋ مۇمكىندىگى بار
وتىرىس بارىسىندا بارلىعىنا ارنالعان تەگىن تەحنيكالىق ءبىلىم بەرۋ باعدارلاماسى جايىنا توقتالعان ءمينيستردىڭ دەرەگىنشە، وڭىرلەردە 1850 ۇتقىر توپ قۇرىلىپ، ولار 9-11 - سىنىپتى بىتىرگەن تۇلەكتەر اراسىندا ءتۇسىندىرۋ جۇمىستارىن جۇرگىزگەن.
«اعىمداعى جىلى جوبا اياسىندا كوللەدجگە قابىلداۋ ۇشتەن بىرگە ارتىپ، باعدارلاما ەسەبىنەن قوسىمشا تۇسكەندەردىڭ سانى 21 مىڭ ادامعا جەتتى. باعدارلاماعا قاتىسۋشىلارعا شاكىرتاقى، ءبىر رەتتىك ىستىق تاماق جانە جول شىعىنى قاراستىرىلعان. اتالعان باعدارلامانى قارجىلاندىرۋعا رەسپۋبليكالىق بيۋدجەتتەن 4,3 ميلليارد تەڭگە ءبولىنىپ، جەرگىلىكتى بيۋدجەتكە جىبەرىلدى. جوبا اياسىندا، سونىمەن قاتار، قىسقا مەرزىمدى كۋرستاردا وقىتۋ دا جۇرگىزىلۋدە. اعىمداعى جىلى 71 مىڭ ادامدى قابىلداۋ جوسپارلانۋدا. بۇگىنگى كۇنى قىسقا مەرزىمدى وقۋعا 61 مىڭ ادام جىبەرىلدى»، - دەدى ەرلان ساعادييەۆ.
ال ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ جۇرگىزىلىپ جاتقانىن اتاپ ءوتتى.
«اتالعان جوبامەن 15088 ادام قامتىلىپ، ونىڭ 2300-دەن استام ءوز ىستەرىن اشۋعا جانە بيزنەستەرىن كەڭەيتۋگە نەسيە الدى»، - دەدى ول.
تالقىلانعان ماسەلەگە قاتىستى پىكىر بىلدىرگەن ۇكىمەت باسشىسى باقىتجان ساعىنتايەۆ نەگىزگى ماسەلە جۇمىسقا ورنالاستىرۋ ەكەندىگىن باسا ايتا كەلە:
«باستاۋ بيزنەس» جوباسى قانشا ادام وقىسا، سونشا نەسيە بەرۋ كەرەك دەگەندى بىلدىرمەيدى. ولاردىڭ بارلىعى بىردەي كاسىپكەر بولۋى مۇمكىن ەمەس. دەگەنمەن، بەرىلەتىن شاعىن نەسيە كولەمىن ارتتىرۋ قاجەت. مينيسترلىكتەرمەن، «اتامەكەنمەن» قاجەتتى شارالاردى قابىلداۋ كەرەك»، - دەدى پرەمەر- مينيستر.
اۆتور: مارلان جيەمباي
