الەم اپتا ىشىندە: اۆستريادا 71 ميگرانت جانتۇرشىگەرلىك ازاپپەن ءولدى

ماسەلەن، سوڭعى 2 اپتا بويى ميلليونداعان ونەرسۇيەر قاۋىم ارگەنتينادا ءوتىپ جاتقان جىلسايىنعى تانگودان الەم چەمپيوناتىنا ءجىتى نازار اۋداردى.
مۇنان بولەك، جاھاندىق جاعىمسىز جاڭالىقتار دا الەم جۇرتشىلىعىنا جەدەل جەتكەنى بەلگىلى. اتاپ ايتقاندا، اۆستريادا 71 زاڭسىز ميگرانتتىڭ مۇردەسى تابىلسا، ا ق ش- تا تىكەلەي ەفير بارىسىندا 2 ءجۋرناليستى اتىپ كەتتى.
تانگودان الەم چەمپيوناتى ءوتتى
جۇما كۇنى ارگەنتينانىڭ استاناسى بۋەوس- ايرەستە ەلدىڭ باس قالاسىنىڭ Luna Park ستاديونىندا ەكى اپتاعا سوزىلعان تانگودان الەم چەمپيوناتى ءوز مارەسىنە جەتتى. اعىمداعى جىلى كونكۋرسانتتاردىڭ جۇزدەن جۇيرىك شىعۋ ءۇشىن ەرەكشە تەر توگۋىمەن ەرەكشەلەندى دەسەك تە بولادى. ويتكەنى، بۇل جولى جارىسقا الەمنىڭ 46 ەلىنەن شامامەن 700 جۇپ قاتىسقان ەدى.
چەمپيونات سالوندىق جانە ساحنالىق تانگو اتتى ەكى سانات بويىنشا وتكىزىلدى. ولاردىڭ اراسىنداعى باستى ايىرماشىلىق، ەكىنشىسى بۇل ءبيدىڭ «التىن عاسىرى» سانالاتىن 1940 -جىلدارعى ستيلدى قاتاڭ ۇستانادى. وعان نەگىزگى قادامدار مەن ايشىقتاردى قامتيتىن باياۋ ىرعاقتى قوزعالىس ءتان. ىرعاقتى قوزعالىستاردىڭ دالمە- ءدال ورىندالۋىنا باسا نازار اۋدارىلادى. جۇپتىڭ بارلىق ىرعاعى قۇشاقتاسۋعا مۇمكىندىك بەرەتىن كەڭىستىكتە عانا ورىن الۋى ءتيىس.
ال سالوندىق ستيل بولسا ساحنالىق تانگوعا مۇلدەم قاراما- قايشى. وندا قادامدار مەن ايشىقتار شالت ورىندالىپ، ادامنىڭ دەلەبەسىن قوزدىرا تۇسەدى.
سونىمەن ارگەنتينانىڭ كوردوۆا قالاسىنان كەلگەن دجوناتان سااۆەدرا مەن كلاريسا اراگون چەمپيونات جەڭىمپازى اتاندى. «سالوندىق تانگو» ساناتىنداعى ەكىنشى جانە ءۇشىنشى ورىندار دا ارگەنتينالىق جۇپتاردىڭ قانجىعاسىن مايلادى. «بۇل مەن جۇزەگە اسىرۋعا كوپتەن بەرى تالاپتانىپ كەلە جاتقان ارمانىم بولاتىن. جارىسقا قاتىسقان كەز كەلگەن جۇپتىڭ جەڭىمپاز بولۋعا مۇمكىندىگى بولدى. ناتيجە ءار ۋاقىتتا توسىن بولاتىندىعى بەلگىلى، ەش ۋاقىتتا دا جەڭىسكە كىمنىڭ جەتەتىندىگىن بىلمەيسىڭ»، - دەيدى كلاريسا اراگون.
بۇل جۇپ تەك ساحنادا عانا ەمەس، سونىمەن بىرگە ومىردە دە جۇپتارى جاراسقان جاندار. ولاردىڭ جەڭىسكە جەتۋ قۇپياسىنىڭ ءبىرى وسىندا دا سياقتى. «كلاريسا ماعان تانگودا كوپ نارسە ۇيرەتتى. مەن باستاپقى ساتتەن- اق ءبىزدىڭ جەڭىسكە جەتكەنىمىزدى قالادىم»، - دەدى دجوناتان سااۆەدرا.
ال چەمپيوناتتىڭ ساحنالىق تانگو ساناتىنىڭ جەڭىمپازى ءارى 5 مىڭ دوللار كولەمىندەگى سىياقىنى تاعى ءبىر ارگەنتينالىق جۇپ ەسكەل لوپەس پەن كاميللا اللەگري ۇتىپ الدى.
تانگو ءبيى شىعۋىنىڭ عاسىردان استام تاريحى بار. باستاپقىدا بۇل بيمەن تەك ەركەكتەر عانا اينالىسىپ، ءسال كەيىنىرەك ولار سەرىكتەس رەتىندە جەزوكشە ايەلدەردى بيگە تارتقان. ال بۇگىنگى كۇنى بۇل ءبيى الەمنىڭ بارلىق ەلىنە تانىمال. جىل سايىن ارگەنتينا استاناسى بۋەنوس-ايرەستە تانگودان الەم چەمپيوناتى وتكىزىلەدى. ءبي سايىستارىن شامامەن 100 مىڭ ادام تاماشالاسا، ولاردىڭ ۇشتەن ءبىرى شەتەلدىكتەر بولىپ كەلەدى.
اۆستريادا 71 ميگرانتتىڭ مۇردەسى تابىلدى
بەيسەنبى كۇنى اۆستريا مەن ۆەنگريانى جالعايتىن اۆتوماگيسترالدا جول جيەگىندە توقتاپ تۇرعان ەت ونىمدەرىن تاسيتىن جۇك كولىگىنەن اۆستريالىق قۇقىق قورعاۋ ورگاندارىنىڭ قىزمەتكەرلەرى 71 زاڭسىز ميگرانتتىڭ مۇردەسىن تاپتى. اۆستريالىق بيلىك وكىلدەرىنىڭ باستاپقى تاراتقان اقپاراتىندا جۇك كولىگىنەن شامامەن 50 ادامنىڭ مۇردەسى تابىلعاندىعى ايتىلعان ەدى. دەگەنمەن، بۇل مالىمەتتەردىڭ ناقتى دەرەك ەمەس ەكەندىگى كەيىننەن بەلگىلى بولدى. اۆستريا پوليتسياسىنىڭ حابارلاۋىنشا، جۇك كولىگى قۇقىق قورعاۋ ورگاندارىنىڭ نازارى اۋعانعا دەيىن 1 تاۋلىك بويى جول جيەگىندە تۇرعان.
سوت- مەديتسينالىق ساراپتاما مالىمەتتەرىنە سايكەس، ميگرانتتار تۇنشىعىپ ولگەن. الدىن الا تەكسەرۋ بارىسىندا ميگرانتتاردىڭ كوز جۇمعانىنا ءبىراز ۋاقىت بولعانى ءارى كەيبىرىنىڭ مۇردەسى ءىرىپ- ءشىري باستاعانى بەلگىلى بولدى. اۆتوماشينانى قاراۋ بارىسىندا ادامداردىڭ جانتۇرشىگەرلىك ازاپپەن ولگەنى انىقتالدى. جۇك كولىگىنىڭ ىشكى قاپتاسىندا تىرناق ىزدەرى قالعان، ياعني، ادامدار سىرتقا شىعۋعا تىرىسقان.
رەسمي مالىمەتتەرگە قاراعاندا، تىنىس الۋ مۇمكىن ەمەس جۇك كولىگىنە ميگرانتتار لىق تولى وتىرعان جانە كولىك جۇرگىزۋشىسى سەربيا شەكاراسىنان اۆسترياعا دەيىن ەش جەردە ايالداماستان جەتكەن.
قازىرگى ۋاقىتتا ۆەنگريادا وسى ىسكە قاتىسى بار دەگەن كۇدىكپەن 7 ادام تۇتقىنعا الىندى. ولار ەۋروپالىق وداق اۋماعىندا ميگرانتتاردىڭ زاڭسىز تاسىمالداۋدى ۇيىمداستىراتىن كونترابانداشىلار ەكەندىگى بەلگىلى.
اۆستريا ىشكى ىستەر ءمينيسترى يوحاننا ميكل- ليايتنەر بۇل كۇندى قارالى كۇن دەپ سانايتىندىعىن جانە قازا تاپقانداردىڭ تۋعان- تۋىستارىمەن بىرگە ازا تۇتاتىندىعىن اتاپ ءوتتى. ءوز كەزەگىندە ەلدىڭ سىرتقى ىستەر ءمينيسترى سەباستيان كۋرتس ەۋرازيالىق وداقتىڭ ميگرانتتاردى قابىلداۋ جونىندەگى ساياساتىنىڭ باستى ەرەجەلەرى جۇمىس ىستەمەيتىندىگىن مالىمدەدى.
ايتا كەتەرلىگى، جۇك كولىگى ۆەنادا ميگرانتتاردىڭ پروبلەماسىنا ارنالعان سامميت وتەتىن كۇنى تابىلعان بولاتىن.
«بۇل ادامدار ەۋروپاعا پانا ىزدەپ كەلەدى. ءبىز ءوزىمىزدىڭ ادام قۇقىعى سالاسىنداعى ستاندارتتارىمىزدى ساقتاۋعا جانە بۇل ادامداردىڭ قۇقىقتارىن قورعاۋ جونىندەگى حالىقارالىق مىندەتتەمەلەردى قۇرمەتتەۋگە ءتيىسپىز» ، - دەدى ەو- نىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى فەدەريكا موگەريني اتالعان وقيعاعا قاتىستى پىكىرىن بىلدىرە كەلە.
تىكەلەي ەفيردە جۋرناليست وققا ۇشتى
سارسەنبى كۇنى ا ق ش- تىڭ ۆيردجينيا شتاتىندا WDBJ7 تەلەارناسىنىڭ تىكەلەي ەفيرىنە قوسىلۋ كەزىندە 2 جۋرناليست وققا ۇشتى. سونىمەن قاتار ولارعا سۇحبات بەرىپ تۇرعان ايەل دە جاراقات الدى.
قايعىلى وقيعا تامىزدىڭ 26- كۇنى تاڭەرتەڭ ورىن العان. تەلەارنا قىزمەتكەرلەرى 27 جاستاعى وپەراتور ادام ۋورد پەن 24 جاستاعى ءتىلشى ەليسون پاركەر Bridgewater Plaza ساۋدا ورتالىعىنا كەلىپ، شتاتتاعى ەڭ تانىمال ساۋدا ويىن- ساۋىق ورتالىعىنىڭ جۇمىسى جايىندا رەپورتاج جاساماق بولعان.
ە. پاركەر جەرگىلىكتى ساۋدا پالاتاسىنىڭ قىزمەتكەرىنەن سۇحبات الا باستاعان كەزدە وق اتىلىپ، جۋرناليستەردىڭ ەكەۋى سول جەردە قازا تاپسا، سۇحبات بەرۋشى ايەل جاراقاتتانعان.
وسىدان كەيىن قىلمىسكەر وقيعا ورنىنان بوي تاسالاپ، ونى ىزدەۋگە ونداعان پوليتسيا قىزمەتكەرلەرى جۇمىلدىرىلعان. كوشەلەر قورشاۋعا الىنىپ، قاۋىپسىزدىك ماقساتىندا قالاداعى مەكتەپتەر جابىلعان. تاراتىلعان اقپاراتقا قاراعاندا، قىلمىسكەر اۆتوماگيسترال ارقىلى قاشىپ كەتپەككە ارەكەتتەنگەن. ءبىراق، پوليتسيا ىزىنە تۇسكەننەن كەيىن ول ءوز- وزىنە قول جۇمساعان.
ءسال كەيىنىرەك WDBJ7 تەلەارناسىنىڭ قىزمەتكەرلەرىن ولاردىڭ بۇرىنعى ارىپتەسى 41 جاستاعى ۆەستەر لي فلەناگاننىڭ اتقانى بەلگىلى بولدى. ايتا كەتەرلىگى، فلەناگان ءوز ارىپتەستەرىن ءولتىرۋ بارىسىن ۇيالى تەلەفونىنا ءتۇسىرىپ العان.
اتالعان جازبادا ونىڭ ۇزاق ۋاقىت بويى ارىپتەستەرىن نىساناعا الىپ تۇرعانى انىق بايقالادى. ءبىراق، مۇنى جۇمىسقا كىرىسىپ كەتكەن جۋرناليستەر ەش بايقاماعان. ۇزاققا سوزىلعان ۇزىلىستەن كەيىن قىلمىسكەر ارىپتەستەرىنە وق جاۋدىرعان.
فلەناگان بۇل قىلمىسقا بىرنەشە اپتا بويى دايىندالعان. ول ءۇشىن 2 تاپانشا ساتىپ الىپ، وققا ارىپتەستەرىنىڭ ەسىمدەرىن ويىپ جازعان، كولىكتى جالعا العان جانە «وزىمە جانە دوستارىما ءولىم الدىنداعى جازبا» دەپ اتالاتىن 23 بەتتىك حات قالدىرعان.
باتىس ب ا ق- تارىنىڭ حابارلاۋىنشا، فلەناگان قىزمەتتىك مانسابى جولىندا سوڭعى ۋاقىتتا ساتسىزدىككە ءجيى ۇشىراعان. ماسەلەن، فلوريدانىڭ WTWC تەلەاراسىنان جۇمىستان شىعارىلعاننان كەيىن سوتقا تالاپ ارىز جازىپ، ءوزىنىڭ ناسىلدىك قىسىمعا ۇشىراعاندىعىن اتاپ كورسەتكەن. ءسال كەيىنىرەك ۆيردجينيانىڭ WDBJ7 تەلەارناسىندا جۇمىس ىستەگەنىمەن 2 جىل بۇرىن تەرىس قىلىقتارى ءۇشىن جۇمىستان قۋىلعان.
جۇمىستان شىعارىلعاننان كەيىن ول ەڭبەك ينسپەكسياسىنا شاعىمدانعان. ءبىراق ونىڭ شاعىمى قارالماعان. ويتكەنى، تەلەارنا باسشىلىعى وزدەرىنىڭ دۇرىس قادامعا بارعاندىعىن دالەلدەپ بەرگەن. وسىدان كەيىن فلەناگان بۇرىنعى جۇمىس بەرۋشىسىن سوتقا بەرگەنىمەن، بۇل جولى دا ماڭدايى تاسقا تيگەن.
اۆتور: مارلان جيەمباي