الماتىدا جىل سوڭىنا دەيىن 71 جاڭا تۇرعىن ءۇي پايدالانۋعا بەرىلەدى
جيىندا قالالىق باسقارما باسشىلارى شاھاردىڭ سوڭعى 6 ايداعى الەۋمەتتىك-ەكونوميكالىق دامۋى تۋرالى باياندادى. قالالىق ەكونوميكا جانە بيۋجەتتى جوسپارلاۋ باسقارماسى باسشىسى ساردار قابدولوۆتىڭ ايتۋىنشا، العاشقى جارتىجىلدىقتا تۇرعىن ءۇي قۇرىلىسى كولەمىنىڭ ارتۋى بايقالعان.
«بارلىق قارجىلاندىرۋ كوزدەرىنەن 514,7 مىڭ شارشى مەتر تۇرعىن ءۇي بەرىلگەن. ول وتكەن جىلداعى وسى كەزەڭمەن سالىستىرعاند %7,3 ارتىق. شوعىرلاندىرىلعان بيۋدجەتكە 581,6 ميلليارد تەڭگە سالىق جانە وزگە دە مىندەتتى تولەمدەر جينالدى»، - دەدى ول.
باسقارما باسشىسىنىڭ ايتۋىنشا، ايماقتىق ىشكى ءونىم كولەمى 1 397,4 ميلليارد تەڭگەگە جەتىپ،%7,9 ءوسىمدى قۇرادى. جىل باسىنان بەرى 276,7 ميلليارد تەڭگە كولەمىندە ونەركاسىپتىك ونىمدەر ءوندىرىلىپ، نەگىزگى كاپيتالعا قۇيىلعان ينۆەستيتسيا كولەمى 191,4 ميلليارد تەڭگەنى قۇرادى. بۇل وتكەن جىلمەن سالىستىرعاندا %5,6 ارتىق.
قالالىق قارجى باسقارماسى باسشىسىنىڭ ورىنباسارى نينا پيچۋگينانىڭ ايتۋىنشا، العاشقى جارتى جىلدىقتاعى بيۋجەتتىڭ شىعىس بولىگى%99,3 عا ورىندالىپ، 173 ميلليارد 844 ميلليون تەڭگەنى قۇرادى.
قالا باسشىسى شاھاردىڭ ەكونوميكالىق-الەۋمەتتىك سالالارىندا دامۋ كورسەتكىشتەرى بايقالاتىندىعىن جەتكىزدى.
احمەتجان ەسىموۆ ءتيىستى ورگاندارعا جىل سوڭىنا دەيىن اۋماعى 209,7 مىڭ شارشى مەتر بولاتىن 71 تۇرعىن ءۇيدى، «سايران» جانە «ماسكەۋ» مەتروستانسالارىن، 3 اينالما جولدى پايدالانۋعا بەرۋ تۋرالى تاپسىرما بەردى.
سونداي-اق ناۋرىزباي اۋدانىنىڭ دامۋ جوسپارىن قۇرىپ، قاجەتتى الەۋمەتتىك جانە ينجەنەرلىك ينفراقۇرىلىمداردى - جول، مەكتەپ، ەمحانا، بالاباقشا سالۋدى تەزدەتۋدى ەسكەرتتى.
اۆتور: گۇلميرا ءعوسمانالي
