دەپۋتاتتار ءار بالاعا 70 مىڭ تەڭگە كولەمىندە جاردەماقى بەلگىلەۋدى ۇسىندى

استانا. قازاقپارات - بۇگىن ءماجىلىستىڭ جالپى وتىرىسىندا قازاقستان حالىق پارتياسىنىڭ فراكسياسى اتاۋلى الەۋمەتتىك كومەكتى (ا ا ك) الىپ تاستاۋدى ۇسىندى.

ونىڭ ورنىنا ءار بالاعا جۇمساۋعا جەتكىلىكتى مولشەردە ءبىرىڭعاي جاردەماقى تولەۋ كەرەك ەكەنى ايتىلدى، دەپ حابارلايدى قازاقپارات ءتىلشىسى.

«الەۋمەتتىك سالاداعى مەملەكەتتىك ساياساتتىڭ نەگىزگى باعىتى - كوپبالالى انالاردى، تولىق ەمەس وتباسىندا بالا تاربيەلەپ وتىرعان انالاردى جانە دامۋىندا ەرەكشەلىگى بار بالالاردى تاربيەلەپ وتىرعان انالاردى قولداۋ. كوپبالالى وتباسىلاردىڭ باسىم بولىگى كوبىنەسە جالعا بەرىلەتىن بولمەلەردە تۇرادى. ەگەر يپوتەكا راسىمدەۋ مۇمكىن بولسا، ادەتتە قۇرىلىس ساپاسى تومەن، ەكونوم ساناتتاعى ءبىر بولمەلى پاتەر الادى. ولار ءۇشىن مەملەكەتتىك تەگىن تۇرعىن ۇيمەن قامتاماسىز ەتۋ تاجىريبەسى جوق، يپوتەكالىق نەسيە بەرۋدىڭ جەڭىلدەتىلگەن شارتتارى قاراستىرىلماعان. قوماقتى باستاپقى جارنا تالاپ ەتىلىپ، جوعارى پايىز مولشەرلەمەسى قويىلادى. مۇنداي وتباسىلار مەملەكەتتىڭ قانداي قولداۋىنا ءۇمىت ارتادى؟ اتاۋلى الەۋمەتتىك كومەككە (ا ا ك) مە؟ وبەكتيۆتى تۇردە قاراساق، ول دا ناقتى كومەك بولىپ تۇرعان جوق»، - دەدى دەپۋتات گاۋحار تاناشەۆا ۇكىمەت باسشىسىنىڭ ورىنباسارى التاي كولگىنوۆتىڭ اتىنا جولداعان ساۋالىندا.

ونىڭ پايىمىنشا، ا ا ك- گە ۇمىتكەر بولۋ ءۇشىن كوپبالالى، جۇمىس ىستەمەيتىن انالارعا جۇزدەگەن سىناقتان ءوتۋ كەرەك. قازاقستان حالىق پارتياسىنىڭ فراكتسياسى اتاۋلى الەۋمەتتىك كومەكتى (ا ا ك) الىپ تاستاۋ قاجەت دەپ سانايدى، ويتكەنى ونى الۋ ۇدەرىسى كۇردەلى.

«بۇل جاعدايدا بالالارعا تولەنەتىن جاردەماقىنىڭ مولشەرىن ارتتىرۋ قاجەت. ءار بالاعا ناقتى كولەمدە، جۇمساۋعا جەتكىلىكتى مولشەردە ءبىرىڭعاي جاردەماقى تولەگەن دۇرىس. ءبىز ەڭ تومەنگى جالاقى مولشەرىندە ءار بالاعا ايىنا 70 مىڭ تەڭگە كولەمىندە مەملەكەتتىك جاردەماقى بەلگىلەۋدى قاراستىرۋدى ۇسىنامىز. ماسەلەن، 4 بالاعا بەرىلەتىن جاردەماقى 280 مىڭ تەڭگەنى، 2 بالاعا 140 مىڭ تەڭگە قۇرايتىن بولادى.

قازىرگى ۋاقىتتا 4 بالا 55340 تەڭگە جاردەماقى الادى. ءار بالاعا ايىنا 13826 تەڭگە بولىنەدى. مۇندا ينفلياتسيانىڭ تۇراقتى ءوسۋى، ەكونوميكالىق تۇراقسىز جاعداي، تۇرعىن ءۇيدىڭ جوقتىعى جانە حالىقتىڭ وسى ساناتىنداعى ادامداردىڭ تۇراقتى جۇمىسپەن قامتىلماعانى ەسكەرىلمەگەن»، - دەدى دەپۋتات.

بۇل تۇرعىدا ول جوعارىدا اتالعان حالىقتىڭ الەۋمەتتىك وسال توپتارىنا ارنالعان جاردەماقىنى قالىپتاستىرۋ ساياساتىندا قازىرگى ناقتى جاعداي قاراستىرىلماعانىن ايتتى.

«وسى سالاداعى مەملەكەتتىك ورگاندار جۇرگىزەتىن رەفورمالاردىڭ بارىسى تۋرالى تولىق اقپارات بەرۋدى، سونداي- اق ا ا ك جانە 18 جاسقا دەيىنگى ءبىرىڭعاي بالالار جاردەماقىسىن ەسەپتەۋ ادىستەمەسىن قاراۋدى سۇرايمىز»، - دەدى گاۋحار تاناشەۆا.