مۇراجايلاردىڭ بىرىنەن 70 جالعان ەكسپونات انىقتالدى
تاريحي مۇرانىڭ قۇنى 2,5 ميلليارد وزبەك سومى نەمەسە 230 مىڭ دوللارعا باعالانىپ وتىر. بۇل تۋرالى وزبەكستاننىڭ مادەني مۇرا اگەنتتىگىنەن ءمالىم بولدى، دەپ حابارلايدى «قازاقپارات» ح ا ا مەنشىكتى ءتىلشىسى.
«ارنايى جۇمىس توبى مۇراجاي قورىن زەرتتەۋ بارىسىندا قۇنى 2,5 ميلليارد وزبەك سومىن قۇرايتىن تەڭدەسسىز 70 ەكسپوناتتىڭ (56 سى بەينەلەۋ ونەرىنىڭ تۋىندىلارى) جالعان ەكەنىن انىقتادى. سونىمەن قاتار مۇراجايدا تۇرۋى ءتيىس 1 بەينەلەۋ ونەرىنىڭ تۋىندىسى مەن 1 گرافيكالىق شىعارما جوق بولىپ شىقتى»، - دەلىنگەن ۆەدومستۆونىڭ حابارلاماسىندا.
ايتا كەتەرلىگى، 2011 -جىلى فەرگانا وبلىسىنىڭ ىشكى ىستەر باسقارماسىنا 21 ەكسپونات تاپسىرعان. 2016 جانە 2020 -جىلدار ارالىعىندا ولاردىڭ تەك 14 ى عانا قايتارىلعان. قازىرگى تاڭدا فەرگانا وبلىسىنىڭ ىشكى ىستەر باسقارماسىندا مۇنداي قۇندىلىقتاردىڭ جوق ەكەنى انىقتالىپ وتىر.
اگەنتتىك وكىلدەرى سونداي-اق تەكسەرۋ بارىسىندا مۇراجايدى كۇردەلى جوندەۋگە بولىنگەن 3,1 ميلليارد وزبەك سومىنىڭ 1,4 ميلليارد سومى ۇرلانعانى انىقتالعانىن حابارلادى.
اتالعان دەرەكتەر بويىنشا قىلمىستىق ءىس قوزعالىپ، تەرگەۋ ءجۇرىپ جاتىر. بۇعان دەيىن وزبەكستان مۇراجايلارىنان 30 جىلدا 3 مىڭنان استام تەڭدەسسىز مادەني قۇندىلىقتار جوعالعانى حابارلانعان بولاتىن. كەلتىرىلگەن شىعىن كولەمى 4 تريلليون سوم نەمەسە 357 ميلليون دوللاردى قۇرايدى. مۇراجايدان ۇرلانعان قۇندىلىقتاردىڭ وسىنشاما زور كولەمدە ەكەنىن ەسكەرە وتىرىپ، وزبەكستان پرەزيدەنتى باس پروكۋراتۋرا، تۋريزم جانە مادەني مۇرا مينيسترلىگى باسشىلىق ەتەتىن كوميسسياعا وزبەكستان مۇراجايلارىنداعى جادىگەرلەردىڭ بارلىعىن تۇگەندەپ، جىل سوڭىنا دەيىن ولاردىڭ ەلەكتروندى بازاسىن جاساۋدى تاپسىردى.
